【独家】工作劲忙叹日菜慰劳自己　Eric Kwok放假凑爱犬买外卖

曾为ViuTV选秀真人骚《全民造星》担任导师的Eric Kwok（郭伟亮），最近为无綫主持音乐节目《劲歌金曲》，又为歌唱比赛《声梦传奇》任评判，忙到七彩的他仍不忘陪下「囝囝」，早前《头条日报》记者撞到佢带爱犬「金菠萝」（菠萝）落大坑，仲买高质日本料理返屋企叹。采访：张咏森

最近除了忙于录影TVB节目，Eric Kwok亦要兼顾YouTube Channel「Round Table Poker」短片拍摄。即使工作排到密麻麻，攰到笃笃吓手机都喺沙发瞓着，但一得闲唔使开工，锡到爱犬「金菠萝」燶的他，都会同太太叶佩雯一齐拖狗狗出街散步。早前下午2时许，穿红Tee、戴红Cap帽，成个「利是封」咁款的Eric，揸住红色坐驾到大坑买外卖，而大腿上仲见到菠萝；车辆停泊一边期间，它更探头出窗外八卦，企到攰又将下巴托喺窗边，Cute到晕！

Eric好识食
终于可以落车唞吓，Eric从车尾厢取出宠物手推车，被爸爸放到手推车上的菠萝，立刻揈一揈舒展筋骨，有街街去的它更兴奋到狂摆尾巴、吐出舌头，非常精灵！之后，Eric孭好袋便推住车仔，步行至鮨辰日本料理落Order；该店一个Lunch set平均约二、三百蚊，最出名食Omakase（厨师发办），睇嚟Eric食个下午茶都好讲究。向职员点好餐后，两父子企喺门外等，最后拎埋嘢食就揸车返归。