【独家】感激花姐刻薄批评改善陋习 张天赋乐见MIRROR有好成绩

19年参加《全星造星II》并夺得亚军的张天赋（MC）得奖后冇签ViuTV，单打独斗年几终于加盟华纳唱片推出头炮新歌《Good Time》。新歌喺自家YouTube频道上架三星期，浏览率高达130万，被喻为来年新人奖三甲人选，跟同是《造星》出身的吕爵安（Edan）及曾比特(Mike)争高下。虽然被睇好，但MC坚持奖项只系花红，大前题系做好音乐，否则有奖都对唔住自己。采访：方骞平 摄影：张咏森

张天赋好锺意《Good Time》呢首歌：「𠵱家市面上啲歌普遍都几沉重，不如做首轻松啲，同人打气嘅歌成为出道作品，亦希望系我出道嘅Good Time！」被问到系咪冇咗「华纳一哥」许廷铿，公司会集中火力捧他，变相系最佳时机？MC答得相当得体：「我反而遗憾未见过佢真人，咁我都希望受到公司爱戴嘅！(想唔想成为「华纳一哥」？)暂时仲系新人，未谂到咁长远，做好自己先啦。」当年冇签ViuTV，他坦言未Ready好，对未来路向唔够清晰，直至同华纳歌手洪嘉豪、曾若华(JUDE)合作过，觉得同华纳唱片好夹，如音乐上，公司由他想点就点，又唔会管制他拍拖，当然是指健康的感情关系。

讨厌以前嘅自己
纵使当日婉拒咗花姐嘅合约，但他唔后悔，仲好替《造星》师兄们开心：「见到姜涛、MIRROR、ERROR、P1X3L、Mike等做到锺意做嘅嘢，而且有咁好嘅成绩令人兴奋，尤其香港多返咁多有水准嘅歌手同歌曲系好事。」𠵱家见返花姐，MC话怕丑唔敢跟她讲嘢，但一定会多谢佢：「我绝对尊重花姐，镜头前佢讲嘢可能尖酸刻薄好难听，但私下畀咗好多意见我，教我点样去做星，而且系出于真心，否则闹我都嘥气。最记得拍MV当日我大迟到，佢质问我『要成队人咁等，你唔觉得咁样会影响到人咩？』当时我态度好傲慢反问：『团队系要共同进退，咁你问吓佢哋有冇嘢罗？』睇返自己以往藐嘴藐舌嘅嚣张行为，都觉得好讨厌，有佢训斥，我先识得改善陋习，成就今日嘅我。」