【唔识搞女团】《全民造星IV》经理人由戴颖出任 花姐认对女性是有偏见

「花姐」黄慧君与梁祖尧、许廷铿以及经理人戴颖（阿Wing）今日在九龙湾继续为《全民造星IV》面试即场登记的参赛者，花姐指阿Wing将出任女团经理人，2年前她接下MIRROR经理人时，高层鲁庭晖曾向她介绍阿Wing，虽然当时未成事，但二人私下老友，所以她决定将这重任交至对方手上：「我认对女性是有偏见，我睇唔到佢哋系唔系观众喜欢嘅类型，咁样对组成女团唔好，其实我喺面试嘅出席率好低，因觉得自己坐喺现场冇用、唔识得畀分呀，而且我最憎系扮可爱、扮可怜嘅女仔！」

早前黄榕哭诉在《造星IV》的面试被狠批，阿Wing形容是花姐爱的表现，花姐则说：「当时佢放低本写真集，我觉得参加《造星IV》唔需要卖弄，加上佢跳唱不好，如果有心参加应该有更多准备，不过佢嘅态度好好，点样畀人批评都喺人前笑，搞到我都有啲戥佢心痛。」花姐向来爱锡MIRROR，问到自称MIRROR粉丝是否无加分？花姐表示要看目的，目的是找到渴求加入娱乐圈的人，并不会排斥粉丝。

对于有网民投诉面试被取消，随后又推出即场面试，花姐即时认错，她说：「我知道同事有致电参赛者，但系我太多嘢讲，又太锺意闹人，所以Delay咗，但都有女仔再约面试，至于报名又冇机会面试，好抱歉，今次收到4000多份，真系见唔晒。」至于女团人数？阿Wing与花姐表示暂未有数字，笑言不希望是12人，也考量到比赛过后没有人值得签也没关系，搞笑称届时会安排自己出道，最重要是组成有质素及特色的女团。