【独家】爱上演戏唔介意剃头做宅男 Anson Lo为角色可以全裸

身为偶像难免有包袱，而MIRROR身为当红偶像男团，偶包更加难免，呢期凭剧集《大叔的爱》饰演暖男「阿牧」爆红的Anson Lo（卢瀚霆、AL），经常被评为keep靓仔样劲厚粉，畀人感觉偶包超重，不过未来想多向演员路发展的AL同《头条》话，由拍《大叔》开始早已掉低偶包，讲明唔怕尝试任何角色，就算好似《调教你MIRROR》时最惊嘅须根露额头look演出，一样无问题，有需要甚至好似梁朝伟一样全裸拍《色戒》亦接受到，为做好演员绝对冇底线。不过唔知一班「神徒」又接唔接受到喎！？撰文：杜淑霞 摄影：谭壹致 形象：PIPA Creative 发型：Denny Ku@Chic Private I Salon 化妆：Giann Cheung@Annie G Chan Makeup Centre 服装：Versace、Giuseppe Zanotti

AL同Edan（吕爵安）这对《大叔的爱》的「登神CP」，近期频频孖住现身，日前出席活动更搞到fans迫爆商场，AL直言好珍惜同Edan一齐开工机会，「未厌呀！的确公司有个order，唔可以成日『登神』出现，但系我唔知咩原因，但系唔可以吓吓我哋两个一齐出嚟，我都同吕爵安讲，我哋每次一齐做嘢好开心，会好好珍惜嗰啲时刻，同埋知道近排fans好想睇我哋，上次个event系出道以嚟其中一个最开心嘅工作，大家好热情欢呼。」最近推出《大叔的爱》片尾曲《不可爱教主》MV，AL竟然放弃实现同靓女主角锡锡机会，提议搵Edan帮手演出，「呢首歌冇谂住派台，录完真系好锺意呢只歌，公司开完会都觉得呢只歌几好听唔好嘥，派台拍MV都有谂过不如完全唔关《大叔的爱》事啦！拍个同女仔嘅恋爱故事，但系我再谂番系自己斩断咗个机会，大家都觉得系关《大叔》事，应该回馈番《大叔》有少少关系，做个喺平行时空『阿田』同『阿牧』故事。」

录音时险失声


不过AL自爆录《不可爱教主》时面临失声边缘，所以压力超大，「录到第3个section，花姐车我返屋企，佢问我做咩唔讲嘢，我嗰时其实好担心，一来担心只歌录唔好，呢只歌我系寄予好大期望，因为我好锺意《大叔的爱》套剧，我唔想有机会唱片尾曲唱衰咗，同埋正值演唱会前一个礼拜，我未睇医生已经feel到自己把声顶唔顺，我𠵱家呢个状态会唔会令嚟紧所有plan都要搁置呢？花姐嗰时有讲不如同监制讲唔唱片尾曲，但我好坚持，做咩无嗱嗱放弃！（有担心演唱会？）MIRROR其他兄弟都讲帮你幕后代唱，但系我solo个表演冇得幕后嘛！咁耐冇开演唱会，大家都好期待，但如果出到嚟就算我跳舞几型都好，但我把声唔得！花姐有提议将个MMM校好大声，但我唔要同全世界讲我唱唔到，不如直接cut咗我solo算。」



AL虽然对唱歌好有要求，但《调教》时要唱歌同演戏二拣一，他竟然拣演戏，因他对演戏兴趣愈来愈大，「呢一刻真系锺意做戏多过唱歌，我系想钻研演技多啲，《大叔》令我觉得好好玩，可以活第二个人生，呢个感觉好奇妙。我用3个月时间觉得Anson Lo消失咗，『阿牧』视角去睇嘢，就算我返到屋企都觉得自己系『阿牧』。」AL仲想试更多不同性格角色，「我谂好多观众好有兴趣Anson Lo仲可以做到啲乜嘢，譬如我想试啲好粗鲁、好冲动嘅年青人，同埋好宅男，阴暗面好重嘅人，同Anson Lo反差好大嘅。（可唔可以《调教》时须根见额头Look？）其实我想试，我都有同花姐讲，倾嚟紧project发型唔使keep𠵱家咁。（光头？）得㗎！冇所谓，你叫我完全唔化妆，叫我剃头，完全OK，因为for一个角色，我觉得就系要撇甩自己卢瀚霆嘅嘢。（冇乜底线？）冇乜底线！（全裸，好似梁朝伟拍《色戒》？）for一个好啱嘅原因咪得罗！譬如个戏份上你要全裸先表达到你呢个情绪，或者呢个剧情，我都唔抗拒。（冇偶包？）冇，就算做『阿牧』好暖男，有人觉得等如偶包，你问我系咪一个咁暖嘅人，100%为人着想、牺牲自己都未必做到，我都会有情绪，『阿牧』情绪可能冇我对住妈咪发脾气个情绪咁多，我都有撇开我个偶包去投入『阿牧』个角色。」