【独家】冇港姐包袱着热裤擘髀跳钢管舞 郭柏妍狂扭蛇腰任睇39寸长腿

为配合市场需求，TVB积极力捧年轻新女上位做「小花」，如去年港姐季军，23岁郭柏妍（Rosita）唔止学历高，外表清纯，仲自爆系「A0」，深得唔少巴打欢心。所以Rosita仍未卸任，但去年已被调入剧组成为重点新人。日前郭柏妍喺新剧《双生陌生人》中换上Crop Top加热裤大跳性感钢管舞，Rosita一埋位就随住音乐拍子擘髀、趷箩加扭Pat Pat，意态撩人相当挑逗！采访：方骞平 摄影、谭壹致

近年TVB不断力捧「小花」上位，如24岁刘颖镟、27岁何依婷及21岁游嘉欣外，被封「甜美女神」的郭柏妍都有好多机会，去年10月首次拍剧就同陈豪拍重头剧《白色强人II》，刚又拍完《青春不要脸》，再紧接拍林志华监制的《双生陌生人》。目前Rosita一边开工，一边读紧港大食物安全管理硕士，有姿色，有学识，而且零绯闻，形象够正面，最重要肯搏肯捱！好似喺TVB《明星运动会》参加游水、射箭比赛，Rosita全情投入亦唔介意淡妆出镜。

跳钢管舞唔尴尬

日前Rosita喺新剧《双生陌生人》中有场solo，剧情讲饰演见习律师的她喜欢跳钢管舞嚟减压。所以Rosita戴上白色长假发，换上Crop Top、热裤，脚踏5寸斗零踭高跟鞋，每当导演一嗌开机，她就随住音乐拍子喺咁扭动身体，见她挺腰收腹，自信满满咁用39寸长腿夹实钢管，再做出一系列旋转动作，其间还要擘髀，性感撩人，最后仲要喺地上做出多款钢管舞必备动作，如趷箩及扭Pat Pat，估唔到纯情小花可以咁hot呀！

问Rosita会否尴尬？她说：「虽然件衫得少少布，但都唔尴尬，因为都系想做好件事，想套剧出嚟好睇。第一次跳钢管舞就临急学咗3个钟，每次练习都有受伤，双腿内侧跳到瘀晒，感激化妆师同我搽粉遮瑕。」Rosita亦唔介意太性感，亦好多谢剧组愿意提点、教导及相信她。她说：「我同何广沛、蒋家旻比较多对手戏，佢哋帮咗我好多，教我眼神及演技上点样可以做得自然啲。我真系好锺意做戏，希望毕业后专注做演员。」

叮嘱师妹做自己

对于着一件头泳衣出战TVB《明星运动会》游泳比赛，她开心说：「感觉好似返番去校运会咁，好热血，落得去比赛就要比力，有需要嘅话，着泳衣冇问题。多谢网民称呼我做女神，我觉得要做最真嘅自己，都希望新一届师妹(港姐佳丽)可以enjoy舞台，展现真正嘅自己。」