【独家】为女友健康着想提点饮食 汤洛雯遭马国明禁饮汽水
2021-06-17 19:00 
汤洛雯（靓汤）最近在《一笑渡凡间》首度演古装打女，虽然辛苦，但靓汤反而好享受拍古装，仲话男友马国明都好锺意睇。讲到马明近期经常不在港，靓汤觉得各有各忙冇问题，但对于第4度传婚讯感无奈。近年因keep fit成专家的她，有意开频道分享心得，她大赞注重健康又keep得好的马明，平日有提点她的饮食。撰文：杜淑霞 摄影：张咏森 服装：FILA 场地安排：barry工作室 场地：KOL Workshop
靓汤话最初拍古装以为好辛苦，但拍拍吓就惯，仲爱上拍古装，「虽然开工啲汗系湿到连出面件褛都湿埋，不过我好锺意神话，又好锺意睇古装剧，𠵱家少古装剧开，会更加珍惜机会。」她透露马明都恨睇，「《一笑》佢兴奋过我，佢隔离紧冇乜嘢做，阿萧（萧正楠）又系佢好朋友，同埋佢好耐冇睇过古装剧。」讲到跟马明今个月才公开拍拖一年，已4度传婚讯，靓汤没好气话，「传第4次唔答啦！大家拭目以待，都系正常情侣啫！」对于早前放闪帮代表马明的毛公仔洗白白，她笑道：「𠵱家个公仔都出名咗，（帮马仔冲凉？）浸吓水帮佢捽吓啫！见到啲comment话好污糟，系啲灯打埋嚟灰灰暗暗咁，其实好白雪雪嘅。」
赞马明身材keep得好
之前受体重问题困扰的靓汤，原来有意开频道分享keep fit经验，「我想搞个YouTube平台，但系唔想是但开个live，我真系想set得靓一靓，有晒字幕自己剪片一脚踢嗰种，其实我叫好多artist帮手拍咗个预告，之前最肥想记录自己点样减，但系因为拍剧真系拍唔到。」靓汤谓马明不介意她肥瘦只重视健康，仲赞男友身材keep得好，「如果我系唔食嘢会晕低嗰啲，佢梗系唔畀啦！但系佢知我根本就系好锺意食嘢，要畀好多力先至可以唔食嘢，所以佢完全唔会担心我会饿亲自己。佢觉得健康最紧要，佢就唔系好锺意我饮代糖汽水，始终代糖唔系好有益，会叫我饮有汽嘅水代替，佢对自己身材意识其实都高，佢要长期拍嘢，加上又唔系特别锺意食嘢，晚餐突然唔食都得。」
最新回应