【独家】同陈桢怡郭柏妍齐派利是感新奇谢嘉怡冇时间拍拖事业行先

2021-02-18 23:15

应届香港小姐冠军谢嘉怡（Lisa）、亚军陈桢怡（Celina）、季军郭柏妍（Rosita）喺大年初一返公司做新春节目。今年三人都初尝派利是滋味，Lisa感觉好新奇，她哈哈大笑说：「𠵱家Celina同Rosita变咗系我个伴侣咁，一齐派同一个银码嘅利是畀人！」Lisa暂时以工作为重，暂时唔需要搵伴侣！采访：方骞平摄影：谭壹致

大年初一，四位应届港姐谢嘉怡、陈桢怡、郭柏妍及「友谊小姐」邝美璇喺TVB新春节目中跟「财神」胡枫一同派利是，陈桢怡听前辈讲做艺人要派吓利是，所以亦受教，私下有派利是畀工作人员。谢嘉怡愈派愈开心，因为以往只系收利是，今年除咗感受到农历新年热闹气氛，好似多咗人生伴侣咁，成双成对派利是畀人；郭柏妍唔觉得肉赤，因为年初一返公司未必见到好多熟悉嘅人。

Lisa择偶唔可以太靓仔
讲到搵真命天子，除咗陈桢怡有男友外，Lisa同郭柏妍都话要专注事业先，Lisa说：「唔使咁快，我得25岁，咁细个唔使拍拖住，而且啱啱入娱乐圈，好想挑战自己，𠵱家学紧广东话。」记者赞佢可爱一定有人追，Lisa笑言，「Maybe，我唔知，都冇乜时间，有时间都同Celina、Rosita相聚啦，佢哋两个重要过拍拖。」至于拣偶条件，她讲明唔要靓仔：「我主要睇性格，太靓仔太自恋会好有问题，因为我唔系自恋狂，同呢啲人拍拖好麻烦。」而率先有机会拍剧，于新剧《白色强人II》同陈豪合作嘅郭柏妍就相当兴奋，仲话获陈豪提点，教佢点样讲对白会比较自然，𠵱家好锺意做戏，对拍拖零兴趣。陈桢怡表示同男友有共识，趁年轻将重点放喺工作上。