【独家】开骚唱歌保育香港广东歌 区瑞强乐见TVB开放平台
2021-06-18 22:45 
65岁的区瑞强（Albert）将于6月21及22日一连两日，于文化中心举行《我家您再重聚演唱会2021》，相隔两年再开骚，Albert特别珍惜跟乐迷聚首机会，更邀请了胞妹区佳芬及细仔区昕进（Adrian）任嘉宾。keep住开骚唱歌致力保育香港广东歌的他，亦乐见新一辈歌手努力，加上TVB开放平台，有望令香港乐坛重生。撰文：杜淑霞 摄影：谭壹致
习惯年年开骚的Albert，已有两年冇开过所以今次一定要搞，「我觉得一年一聚刚刚好，所以唔计算今次有机会就做。今次叫《我家您再重聚演唱会2021》，好似come back返屋企食饭咁，两年冇见大家要见吓，仲有文化中心系我成长嘅地方，以前啲民歌演唱会全部喺文化中心做；而『我家您』有两个意思，系我同fans，仲有我同家人，所以就搵咗屋企人，我妹同个仔做嘉宾。」
欣赏谭嘉仪
Albert坦言keep住开骚唱歌，目的是帮香港广东歌保育，「将我最熟识七、八十年代嘅香港广东歌，希望将呢啲歌传承落去，我成日挂在口边靓歌保育，重新再活化。」对于近年后辈歌手致力推动香港乐坛，他大力支持，「姜涛牵起咗涟漪出嚟，成个电视台去捧一队组合出嚟，应该嘅，成日话乐坛恶性循环，香港乐坛真空咗好耐，年青人都要搵个对象去追，好似得陈奕迅同容祖儿咁滞，本身好成熟嘅音乐巿场，点可能容许一个天王又好天后又好，雄霸10几年冇换过！」
Albert亦乐见近期TVB开放平台，「成10年冇同外界接触过，全部都系自己人嚟，颁奖、唱歌、选嘅都系自己人，呢个咪小圈子罗！𠵱家开放我觉得呢一步行啱咗，全香港所有歌手都可以上嚟，ViuTV都可以如果你肯，起码四大唱片公司可以嚟，之前连资深都冇，咁好搞笑喎！个圈点会成功，好似足球队咁一定系老大带嫩，乐坛一样，𠵱家重头嚟过，咁样讲好似好悲观，因为衰咗廿年嘛！」而新一辈中他较欣赏谭嘉仪，「唱旧歌，英文歌都得，谭嘉仪非常好，其实佢都出道10年，再新嗰啲冇听，（姜涛？）我真系冇听过，唔知姜涛唱歌点，唔会专登听，如果揸车听到都会听。」
最新回应