【独家】同余德丞拍新剧被疯狂淋水 刘颖镟湿晒身唔觉意晒34D身材

自MIRROR出现，香港娱乐圈生态唔同晒，市场趋向年轻化，TVB亦因应大气候变阵「戒娘」。近日拍紧嘅新剧《青春不要脸》就系针对年轻人市场，用23岁有样有Body的「上位小花」刘颖镟（Tiffany）孭飞。日前Tiffany同31岁余德丞(Dickson)为剧集拍外景，镜头前两人好Enjoy咁张开双手喺雨中奔跑，身穿白恤衫短裙仔的Tiffany全身湿透，半透白恤衫下身形玲珑浮凸，冇露半忽肉但感觉好Sexy，好睇。采访：方骞平 摄影：谭壹致

日前刘颖镟和余德丞喺大埔为剧集拍外景，该场戏要用水车营造「雨中的浪漫」效果，戏内两人拍到全身湿透，沿住条湿滑长斜路向下跑，期间仲要张开双手，又抬起头去感受雨点打在脸上，继而再兴奋转圈，好自由自在咁享受雨景，系咪好有画面?而著住白恤衫、黑色短裤配黑皮鞋、白袜仔嘅Tiffany因为拍到全身湿晒，湿到啲衫滴晒水，就算有打底，白恤衫都仍然透出34D身形嘅曲线美，着到咁都咁性感相信当事人都估唔到。

余德丞拍到冇晒表情
Tiffany同Dickson为咗呢场戏由朝拍到晚，辛苦到不得了，早上拍啲落雨前嘅镜头，但偏偏个天就咁啱落雨，两人要边拍边避雨，同时间翳焗环境下蚊虫特别多，余德丞都算细心，通知工作人员拎蚊怕水嚟护花。另外，因为要take埋手、脚、面容大特写，兼且调教水车出水角度，两人喺条湿滑长斜路上上落落，快跑加慢跑超过30次，完全步步惊心，临尾时雨势更大，两人由头湿到落脚，每拍完1个take，余德丞攰到冇晒表情，Tiffany后生女就冇乜嘢，仲不停笑笑口行去印乾面上水点，不过，因为要抢日光，Tiffany都有主动同导演沟通走位，大家有默契地尽快完成，所以冇乜NG。

第一次拍落雨戏咁Free
问到Tiffany湿晒身系咪好诱惑，余德丞哈哈笑说：「佢梗系吸引啦，港姐喎！」Tiffany笑住话唔系：「系清纯，唔诱惑，咁啱呢套系连戏衫，而且系剧情需要，话我哋好自由自在，唔介意湿身好enjoy件事，带出青春活力感觉。我又唔觉得湿身透视好吸引，反而觉得几好玩，之前拍落雨戏都冇试过咁Care free。」余德丞坦言喺条湿滑长斜路向下奔跑，拍前真系有啲惊，好彩服装间准备嘅鞋防跣，拍起嚟安心好多。病后首次做男一，他透露有压力，而压力来自对自己要求，而唔系怕唔够体力：「我想摆脱观众眼中孱弱嘅感觉。」医生告知Dickson，工作冇问题，运动可照常，一年定期覆诊一次。