【独家】狂接10个广告 自称「ViuTV洪天明」系咁客串 直击193闹市拍外景变Fans见面会

「三爷」193（郭嘉骏）@ERROR因反击曾志伟收视言论，被网友封为「娱乐圈清泉」，不单IG追踪人数暴增，ERROR主持旧节目及热播《ERROR自肥企画》亦成全城热话，三爷在节目中亲自填词新歌《睡到三点》，派台即成热搜榜第2位。当然三爷冇谂过靠讲段真心话弹起，狂接10个广告，仲因ERROR爆红忙到连原本下月举行的Talk Show要延至年尾。问到《自肥》播完粉丝超失落，三爷再爆金句：「我哋系ViuTV洪天明嚟，所有节目都会客串！」果然昨日三爷即客串火火主持新节目《生存演技派》，在铜锣湾街头拍摄时，粉丝闻风而至将三爷包围变粉丝见面会，爆红绝对唔系讲笑，大家知佢咩料啦！撰文：杜淑霞 摄影：张咏森、梁志明（专访）发型：Leo Fan @Chic Private i Salon 化妆：Rainbow&Cori @Annie G. Chan Makeup Centre 服装：FENDI (full set)

三爷弹起，因早前曾志伟指ViuTV收视得4点，题材偏门，只能与旗下J2台比较，同晚三爷反击：「收视点得嗰几百部电视机，我哋不嬲都唔介意」，又指「佢哋系畀老嘢睇嘛」，又话J2节目「冇记错系咪40几岁仲话后生仔倾偈嗰个」，明踩41岁的陆浩明主持《#后生仔倾吓偈》。

三爷重申当时用「老嘢」不太恰当，但并非指曾志伟，「我纯粹讲收视，完全冇提过志伟哥，可能系啲人联想起，我絶对好尊重任何前辈。嗰刻都觉得有少少讲错嘢，当然唔系数据上嘅嘢啦！用字上可以用得好啲。」事件连带ERROR也被炒热，他完全预计唔到，「我系直肠直肚嘅人，咁啱讲开大家认同嘅嘢，先咁有共鸣啫！但系好开心，我哋ERROR一直好努力去做好所有嘢，之前节目搏到尽，屎都食过呀大佬，下体成日受伤，曱甴搲到成身烂晒，但《ERROR游2》播系社会运动，好少人睇，𠵱家终于有人睇番我哋落力做嘅嘢，幕后团队都系阿Mike（格仔导演）『无制限OK编集団』做，大家都好鼓舞。」提到新歌《睡到三点》，三爷自夸好抵用，「节目冇乜budget，炸sound bear炸晒啲budget，哈哈！我加埋都系用五位数，（肥仔solo歌嘅十分一？）一百之一呀！公司畀我做歌系好明智选择，我搵好朋友帮好平咁做到MV同首歌，女主角都搲到好平，自己写埋歌词，我系超抵用，如果畀肥仔嘅价钱嘅话，我出10年歌都得呀！」他仲精心研究用四国语言填词，「香港Hip Hop文化如果Indie嗰啲要多人听，一定要MK妹锺意嘅情歌，总之目标系要洗人哋脑，仲一定要有其他语言。我写咗两、三个礼拜，每日就算冲凉，甚至疴屎谂到一句又写低。」

ERROR年底搞Talk Show


事件带挈人气急升后，三爷顺利成就解锁，获时装杂志邀访问，一个月内劲接10个广告，「好开心终于可以做到自己锺意嘅嘢，又keep到ERROR身份。广告多咗好多呢个系真嘅，暂时ERROR唔会合体做节目住，做番我哋自己锺意嘅嘢。（《自肥》完咗观众好失落？）你哋唔好咁黐线啦！我sell咗老板，但系唔知得唔得，本身6月ERROR系有个Talk Show，但而家太忙搞唔掂，或者年尾搞，到时叫公司搞个新节目畀我哋推吓个Show。（你哋红咗观众少咗嘢睇？）唔会嘅，我哋系ViuTV洪天明嚟，所有节目都会客串，就算我哋冇自己节目。」昨日《头条》就发现三爷同火火现身铜锣湾，原来两人正为火火和虾头主持真人骚《生存演技派》拍摄，火火搵三爷客串帮素人增强自信，「三爷呢啲自信唔知边度嚟，面皮厚过地球，个学员好冇自信，佢学到193少少都帮助好大，所以今日捉三爷嚟。」问到三爷增自信贴士，「当所有人都系垃圾！（火：头先仲有四个字好好，目中无人！）系，目中无人，抬高啲个头就得。」讲到客串，三爷再话：「我系ViuTV洪天明，咩节目都做嘉宾，但系我同火火未实际合作过，一齐做主持之类。（火：佢系ViuTV最红嘅天明，所以先可以目中无人，嗰啲153高度嗰啲睇唔到罗！）我系尊重所有前辈嘅！」