【头条独家】鼓励Ian拍拖 冇谂过放弃保锜 花姐首爆《造星IV》构思斗演技

近期娱乐圈最火热、日日都有新闻的艺人肯定是ViuTV《全民造星》出身的MIRROR和ERROR，16个囝囝有今时今日，节目监制兼经理人花姐（黄慧君）肯定是最大推手，《头条》会一连多日同花姐细数「凑仔」苦与乐。首先讲到他们出道以来最爆新闻之一，肯定是MIRROR的Ian（陈卓贤）和ERROR的保锜（吴保锜），爆完恋闻再爆是非，花姐承认有困扰，更有唔开心闹过保锜，但从来冇谂过放弃。至于《造星III》成功，令TVB节目变阵，更诱发高层大执位，花姐竟然话好开心；花姐又透露正筹备《全民造星IV》，更构思加入更多戏剧元素，为戏剧界发掘更多新血。撰文：杜淑霞 摄影：谭壹致

凑了MIRROR和ERROR两年多，花姐坦承仲学习紧点样做经理人，但囝囝愈红是非愈多，要拆弹唔易。她承认早前Ian和保锜，先后爆完恋闻爆是非，确实有困扰。讲到Ian先跟陈晓华同车传绯闻，再跟卢慧敏（Amy）爆恋情，花姐冇担心过，「佢哋未拍拖前我都话Amy又靓又善解人意又开心，同你（Ian）好夹喎！佢拍咗一、两个礼拜就同我讲。我甚至唔知边个系陈晓华，出咗新闻我冇嘢，因知一定唔系佢。」反而新城颁奖礼当晚Ian被影到跟Amy拍拖冇出席，被插挂住拍拖不工作令她有困扰，「觉得大家误会咗Ian，Ian真系请假5点前去处理屋企事，冇错嘅，同埋突然公开咗拍拖系咪好呢！？困扰半晚好快冇事，因Amy系个好positive嘅女仔，大家会支持，见到佢哋冧滋滋真系开心。」



至于保锜爆出跟沙律（张沛乐）挞着后，被指未与赖嘉贤（Carrie）分手，更有多名女子自称曾被保锜约上床兼拍性爱影片，之后保锜开Live时不满被指「呃虾条」失控爆粗43次还击，引起轩然大波，令花姐一度唔开心，「我嗰时有闹佢，你系公众人物系咪唔应该咁，喺个live度讲粗言秽语，会有小朋友睇紧，嗰刻我系好唔开心，我同佢倾大家对你comment都唔好，我哋消化吓件事，你趁呢段时间作吓歌，佢都好愿望去做，同我讲『花姐你唔使唔好意思㗎！』」但她从冇想过放弃保锜，「心痛保锜有做错事，但系应该原谅一个善良肯努力嘅人。」

开心观众追睇节目


讲到娘家TVB为《造星III》变阵，甚至综艺换埋揸fit人，花姐话：「系咪有啲开心呢！？我开心唔系我赢咗你！真系冇，我好开心我嘅节目有人锺意睇，最开心嗰吓，我啲朋友话要赶返去睇电视，呢个年代嘅人屋企部电视唔系开嚟睇电视，我听见有朋友仲约埋朋友上去睇，我系为咗呢样嘢兴奋多啲，呢个系我志愿嚟，希望我嘅节目大家会好似以前咁返屋企睇，呢样嘢开心过隔离台要变阵，其实隔离台变唔变阵，对我冇影响，我都系咁样做。」


至于正在筹备的新一季《造星》，花姐话正在构思会加入更多戏剧原素，可能要参赛者互斗演技，「《造星III》佢哋有实力但系冇机会，但系第4届佢哋唔系冇机会，可能佢哋唔了解自己最好嘅一面而行错咗路，譬如陈苇璇觉得自己系跳唱，从来冇谂过做戏，如果嚟紧嗰届有陈苇璇类型嘅人，我会讲畀佢听你做戏可能好睇，可能《造星》个重点唔喺跳唱，可能发大少少喺综艺或者戏剧，可以发掘到呢方面嘅星，呢个系我嚟紧呢一年谂法，但系点样做我系未谂到嘅。（受《造星III》影响？）系呀！梁祖尧同彭秀慧畀我影响好大，教咗我好多嘢。如果我可以搵到班做戏好叻嘅星喺《造星》出现都好，我接触好多电影公司嘅人搵演员都断层，我希望我可以搵到一班咁嘅人令到电影行业可以好啲。（导师？）我暂时冇谂法转导师，我好希望系佢哋两个，又好希望梁祖尧可以继续帮我哋手，但佢哋各自有工作喺身要度吓，但我知道我出声佢哋都会愿意，我觉得佢哋会𦧲饭应，哈哈！」