【独家】满约「星梦」转投「邵氏」大把路数 胡鸿钧风骚拍《十月初五》同

今年初胡鸿钧（Hubert）同周柏豪以半个「星梦一哥」姿态瓜分咗《劲歌》总选嘅「最受欢迎男歌星」，但自何丽全取代何哲图接管「星梦娱乐」后，就要求歌手加签埋TVB经理人合约嚟保命！Hubert食正天时地利，咁啱同TVB经理人及星梦合约同时届满，已转投邵氏旗下嘅Hubert有优势「弹出弹入」，睇清楚外围环境先喺唱片方面落注！唔似得「Starz People」艺人周柏豪咁骑虎难下！事业有运行，难怪日前拍摄到胡鸿钧拍TVB新剧《十月初五的月光》时全程表现超风骚，仲帮罗天宇按摩𠻹！采访：方骞平 摄影：张咏森

TVB力捧嘅胡鸿钧、何依婷及罗天宇喺全新版本嘅剧集《十月初五的月光》中孭重飞，分别演当年由张智霖、佘诗曼及马浚伟扮演嘅「初哥哥」、「祝君好」及「司徒礼信」。当日喺锦田嘅外景场口，讲天宇见胡鸿钧约会何依婷个心有啲戚戚然。镜头一转，再跳拍天宇成功追到何依婷，两人拖住手，温馨去睇戏。

扮收音师帮罗天宇按摩
当日Hubert心情大靓，戏内认真做手语，戏外就相当搞鬼，除咗扮做收音师、不停撩人「吹水」外，仲出力帮对紧稿嘅罗天宇按摩肩颈位置，搞到天宇舒服到发出呀呀声！鬼马胡鸿钧又𠱁得米雪auntie好开心咁话：「冇见几日，好挂住你呀！」胡鸿钧为风骚、佻皮解画：「因为罗天宇好慢热，监制落Order要我亲近同关怀佢，而我又锺意同人打成一片，所以由我开心咁带领剧组拍摄，唔玩会好眼瞓㗎！𠵱家天宇俾我融化咗，感受到佢对我有啲嘢！」

坦承人事突变措手不及

最近胡鸿钧签咗邵氏经理人约，问到系咪会续约星梦唱片，踢走唔系TVB「亲生仔」嘅周柏豪坐正做「一哥」？他即避谈，带记者游花圈说：「唔排除所有可能，公司会同我物色一间音乐理念一致嘅唱片公司，𠵱家出面都有唱片公司招手，但未得闲坐低同公司商量。之前我对前途想法，向何丽全及乐易玲闲谈咗个几钟头，何丽全畀到我舒服感觉，啱倾都系考虑留低因素之一，反而系咪做『一哥』唔系重点啦！我相信TVB会帮每一个艺人安排最好嘅工作。」讲吓讲吓，他爆响口话：「因为状态(人事变动)突然，真系杀我一个措手不及，𠵱家潜藏太多可能性，要用时间嚟消化。」他形容不论感情同事业，𠵱家都超happy！另外，慢热嘅罗天宇怪何依婷太保护自己！依婷即解释：「有场戏话我跌喺佢上面，我怕丑好惊，坚持唔好跌太近。」天宇就话同龚嘉欣拍完《香港爱情故事》牀戏，呢啲只属小儿科。