【独家】一提老爷王敏奕即游花园 袁伟豪被指食软饭:系嘅话使出嚟拍嘢？

39岁「底裤大王」的三亿驸马袁伟豪（Ben) 早前出席《万千星辉颁奖礼》时，被网友狠批未老先衰，严重走样！嬲到阿Ben同网民开火，咬牙切齿回应「丑男论」。事隔两个月，袁伟豪靓样回归为TVB新剧《把关者门》拍煞科戏，获监制关树明及同剧演员王敏奕大赞靓仔！但Ben仍耿耿于怀：「呢行饭好难食㗎！」在旁的曾志伟新抱仔王敏奕Feel唔到有几难捱，坚持唔觉老爷做咗TVB高层令佢有优势！采访：方骞平 摄影：谭壹致

痛定思痛，日前袁伟豪拍TVB新剧《把关者门》一场煞科夜戏时，靓样回归！该场戏讲他英雄救美，眼见王敏奕遇危险，畀车追，因而拖住她跑入后巷，再协助她跳上檐篷脱险。袁伟豪丧跑咗几次，之后要扶Venus爬上垃圾桶顶，再出力抱住她双腿，推她上檐篷，连环动作令阿Ben索晒气，攰到不得了，反赞Venus系短跑高手！其中有一吓因为太用力，搞到王敏奕撼头埋檐篷，擦损咗手掌，好彩有监制糖水「万岁」滋润返！

好介意被指走样

早前被网民嘲讽「走样」胶面，袁伟豪坦言好介意：「我本身唔系好靓，亦都唔系丑样，始终因为疫情，屈喺屋企就会争少少，加上之前台庆又忙啲。𠵱家我搵到个窍门，宁愿跑步出咗一身汗去埋位，好过做完健身去埋位。同埋呢排食好少嘢，冇食晚饭，而且食得好清，食椰菜花饭，所以拍呢个剧个样都ok。」在旁监制赞袁伟豪好掂：「我梗系觉得佢得啦，男主角嚟嘛，最buy佢肯默默付出。」记者取笑他系咪新婚，「造人」做到残晒？他即澄清冇咁嘅事：「唔会咁啦，呢啲嘢我时间会分得好好，我唔系18、22好好精力嗰只嘛！40岁要养生，会将精神放喺音乐创作、休息方面。」

王敏奕做好自己

传王敏奕将取代菊梓乔成为「星梦一姐」，有个老爷曾志伟系TVB高层，问系咪有着数？王敏奕偷笑带记者游花园：「我选择呢条演员路及感情路，行到今日都好努力做个好演员，冇后悔当日决定，做好自己嘢先。」袁伟豪忍唔住代答：「其实唔系冇优势嘅，点都有啲，但有就要珍惜，唔好令人失望。」王敏奕猛笑点头话讲得啱，又学到嘢。袁伟豪继续教路：「只要谦卑、认真工作态度就够，如我状态唔好，个样衰啲，咪做返好佢罗！不过，呢行饭好难食㗎！拍条片个样好啲，又畀人话用咗滤镜，是旦啦，我唔用你都用㗎啦！又话我唔化妆好残，个样衰成咁，讲咁多你想我点先？返屋企瞓觉啦！」他愈讲愈忟：「我企出嚟，正正经经打官腔嘢又话我假，成日要人讲啲咁真心嘅说话，你哋啱唔啱听先？真心回应你哋，又话我有态度，究竟我为你而活定为我而活？话我食软饭，系嘅话仲使出嚟拍嘢咩？享受人生好过啦！之前结婚都使晒银行啲钱，我都烦紧几时要供楼，我要靠呢几年努力去赚钱，目标系供满层楼改返写我老婆个名，但呢刻要靠两个人嘅能力先供得到。」王敏奕听到兴高采烈，拍手大笑，大赞他好有智慧。