【独家】《造星III》情侣sweet爆 认爱唔使玩避忌 KLAU喂饱KiKi再揽蛇腰
2021-03-12 21:25 
圈中人拍拖，确实有唔少压力，作为新人更加多顾忌，好似《全民造星III》被网民率先踢爆的情侣KiKi（张凯娸）和KLAU（刘瑞祈），总决赛当晚只敢跟《头条日报》低调谈恋事。不过，早前两人再被影到屈喺车厢拍拖，咀完再叹事后烟后，恋情正式曝光，KiKi日前接受《头条》访问已不再避忌大方讲男友，话明唔会太避忌拍拖，仲大数KLAU优点。事隔两日《头条》果然发现KiKi和KLAU在商场甜蜜约会，被女友赞劲细心的KLAU主动喂女友食嘢，离开时仲揽到KiKi条蛇腰实一实，睇嚟公开恋情后，两人真系一身松晒喎！采访：谭壹致、杜淑霞（KiKi专访）服装：Alice & Olivia（KiKi专访）发型：Alex So @The Attics（KiKi专访）场地：TheAIR (The ONE)（KiKi专访）
多得网民提醒，《头条》在《造星III》十强访问时，已发现KLAU同KiKi情非泛泛，当时KLAU已狂赞KiKi演员出身都好有音乐才华，但当时他只敢话「系好好嘅朋友，会继续发展吓罗！」到总决赛完骚，《头条》再拉两人访问，就轮到KiKi赞KLAU表现出色，问到值几多分？佢仲畀对方爆灯500分，不过当时仍以「好朋友」相称，对恋情低调处理。
善良暖男劲有安全感
不过早前两人被爆深夜将车停在马鞍山恒泰路幽静位置谈心，情到浓时咀嘴达半分钟，食完事后烟又再咀过，而事后两人都大方认爱。早前KiKi接受《头条》专访时，终于敢公开劲赞男友优点多，「佢真系好善良，善良嘅男仔真系好难搵㗎！同埋佢外表好似好恶好cool咁，其实佢好暖男好温柔！例如我有压力，佢会好呵护问你『点呀？食咗嘢未？使唔使我点样呀？』我好记得有次同佢食快餐，佢攞咗张纸巾铺喺我大髀上面，惊我整污糟，从来冇男仔对我做过啲咁嘅嘢，我嗰刻真系好感动，觉得有人锡。同埋我欣赏佢，同佢一齐唔使惊有第三者，佢真系眼尾都唔望吓其他女仔，我会觉得好有安全感，可能佢隐藏得好好，我就唔知啦！哈哈！」讲到拍拖KiKi坦言，「我哋都尽量低调，但系唔会特登避忌。」
边食边吹AA制埋单
既然恋情已曝光，KiKi跟KLAU唔使再避忌屈喺车内拍拖，《头条》发现二人日前下午1时许跟另一对情侣到又一城脚枱脚。四人到了中菜餐厅「王家沙」食晏，其间睇见KLAU似乎比较肚饿不停夹，反而KiKi主力同友人吹水，被女友公开赞细心的KLAU果然好识做，自己食得兴起都不忘女友，惊女方饿亲即主动喂食，KiKi当然相当受落，他们边食边吹叹足个几钟，最后AA制埋单。离开时，唔再避忌的KLAU，揽完KiKi纤瘦蛇腰又转搭膊头，相当顺手。之后，KLAU先后到便利店及饼店买嘢，最后四人由KLAU做柴可夫揸车离开。
最新回应