【独家】自爆性格不合撇老外男友 杨柳青靠逆天长腿吸桃花

自爆性格不合撇老外男友 杨柳青靠40寸逆天长腿吸桃花 大年初三情人节，「Sexy女神」杨柳青（Wiyona）向本报自爆失恋，当天她亲率「桃花团」成员邓洢玲（阿旦）、《全民造星III》十强之一李静莲 (Alina)及林子超（Andy）到著名玄学家陈定帮佛堂祈福兼行桃花运。穿上高叉、短身旗袍嘅杨柳青及Alina斗晒逆天白滑长腿，好抢Fo，而阿旦嘅E cup身形，玲珑浮凸尽展曲线，索呀！杨柳青坦承：「女仔身形靓，就有条件拣个好对象啦！」 采访：方骞平

凭TVB剧集《解决师》弹出嘅杨柳青，32B Fit爆身材劲吸睛，火辣辣引到老外男友把持唔住，喺铜锣湾街头上演揽啜激嘴画面！可惜热恋过后，杨柳青以性格不合提出分手，结束两年情。回复单身的她，今年更加需要桃花。

自爆人愈大愈唔识得拍拖
当天杨柳青闭目双手合十，带住「桃花团」成员绕着桃花顺时针行咗3个圈，其间仲刻意用手肘触碰到桃花枝嚟「攞彩」：「我年年都搵帮帮师傅，佢好准，会畀好多意见我哋，行咗几年桃花运求人缘及观众缘，so far事业运都唔错，但今年真心希望搵到一位高大威猛，有钱有内在，锡我、甚至爱埋我屋企人、朋友嘅真命天子。不过觉得自己人愈大，愈唔识得拍拖，尤其我同前度有文化差异，有啲问题磨合唔到，惟有同佢提出分手喇！但太伤心喇，失恋好似历尽沧桑咁，详情唔想多讲。」陈定帮安慰她放心，今年她系会有桃花嘅，只不过行紧「寡宿」，代表想专注事业，未必咁想拍拖住啫。

李静莲邱士缙sweet爆
做生意仔嘅阿旦反而落晒闸话唔要桃花：「难得政府放宽返食店及按摩店限制，梗系全力搏杀！」而Alina同MIRROR成员邱士缙（Stanley）拍拖拍得好鬼sweet，𠵱家努力赚钱就够：「之前参加《全民造星III》用咗10几万，好彩𠵱家接咗好多job，渐渐搵得返，可能之后我同Manson（张进翘）会有啲合作plan。」至于林子超系杨柳青健身中心拍档，他签咗邵氏，拍紧新剧《十月初五的月光》，事业发展得唔错，有埋桃花就最好。

女仔身形好易拣对象
提到3人变身索爆旗袍美女，杨柳青坦言女仔身形好会加分：「因为做运动会操靓个身形，着衫自然靓，身形好，内在同自信心、成个人嘅气场都会唔同咗，皮肤、气色都好啲，条件好，自然有条件拣人啦！」