【独家】囝囝怕老窦寂寞鼓励搵女友 林子博一家三口食盆菜过年

父兼母职嘅林子博过年前同一对仔女去酒楼食团年饭，15岁大女咏渝不忘卖口乖，狂讲意头说话同老窦拜年𢭃利是，子博乘机整蛊仔女，著他们讲财色兼收，11岁细仔卓楠接受爹哋搵女朋友，因为唔想爹哋孤独终老！对此子博笑言：「新年流流讲呢啲！」真系童言无忌，笑爆嘴！采访：方骞平 摄影：梁志明 场地：龙皇酒家@铜锣湾世贸中心

当天一家三口食团年饭笑声不绝，子博表示除咗代妈咪派利是畀子女外，之前送圣诞礼物都会送得大份啲，要畀埋妈咪嗰份，又透露子女都习惯面对新生活。咏渝说：「我同细佬会互相照顾。」至于边个做家务？子博话好公平，通常玩Card Game，由输家去做，唔会恃住系爸爸点佢哋做嘢。

想返TVB做综艺节目

提到新年愿望，咏渝最想疫情快啲完，子博希望所有人都身体健康，社会尽快回复正常：「𠵱家个个都嗌晒救命，所以最近出咗新歌《逆水行舟》嚟勉励大家，即使逆水行舟爬得好辛苦，但都会有人喺身边支持你，好似张卫健好撑我，之前仲用视像接受我主持嘅电台节目访问。」至于卓楠接受爹哋搵新女友，子博没好气说：「都唔会系𠵱家啦，边有咁快可以呀？」

对于曾志伟做TVB做高层，子博以前常访问他，形容志伟系好好嘅前辈，他坦言：「有机会我都想返去，毕竟喺TVB做咗11年，而且带住两个细路仔，都想搵份稳定嘅工作，可以试吓拍剧同主持综艺节目。」