【独家】腥风血雨 《造星》系囝囝涌入乐坛 《造星III》NY搭John Mark 泰伦斯组男团争食

因为《叱咤乐坛颁奖礼》引发嘅「姜涛效应」成为全城热话，加上MIRROR唔止攞组合奖，队友亦拎咗新人奖。《造星》收成期啱啱先开始，事关有一班同样出身《造星》系列的参赛者亦会于今年相继杀入乐坛搵食。除《造星II》的Mike及MC外，《造星III》得第十名，20岁的锺诺言(NY)亦被娱乐公司安排跟《造星III》的林跃翰(John)、谢嘉浩(Mark)及泰伦斯(Terence)组成跳唱Group，恶斗签约环球的跳唱组合PIX3L，自己人打自己人，誓必掀起乐坛一场腥风血雨。采访：方骞平 摄影：张咏森

出道仅两年，21岁嘅姜涛于今届《叱咤乐坛颁奖礼》夺得「我最喜爱的男歌手」及凭《蒙著嘴说爱你》同时勇夺「我最喜爱的歌曲大奖」，创下最年轻得奖者纪录。其实，姜涛出道后吸引大量女Fans追随，更愿意投入大量金钱卖广告追星，不少唱片公司老板看在眼里深信《造星》出身的年轻歌手有得做，故愿意揼本力捧。

年尾新人奖争到黐线
踏入2021年，华纳唱片率先宣布《造星II》亚军「人气王」张天赋(MC)加盟，环球唱片亦紧随公布，《造星II》冠军吴启洋(Phoebus)与欧镇灏(George)和叶振弘(Marco)以个性跳唱组合PIX3L形式出道。另外，《造星II》第8名，一向是歌唱比赛活跃分子兼经常攞奖的Mike(曾比特)亦签约环球唱片，出道作《我不如》，由《造星II》导师Eric Kwok作曲和监制、林若宁填词。而MIRROR成员吕爵安(Edan)及ERROR队长「肥仔」梁业亦会单飞，预计年尾颁奖礼新人奖必定争过你死我活。

屋邨仔视坤哥为目标
NY参加两次《造星》嚟了解自己，知道能力去到边度：「其实跳舞跳得耐都好想有个平台试新嘢，所以喺20强时拣咗《摩天动物园》演出，点知喺铁笼度爬住唱，力有不逮，失准惹嚟负评，最怕条片会跟足一世！呢件事令到我喺总彩排时失去信心，最后乜都唔理豁出去。」比赛后NY跟Mark及Terence以组合形式面试，而他跟John相识5年，公司顺理成章安排同门四兄弟组跳舞组合进军乐坛：「𠵱家四兄弟一齐向前行，可以加大力量，兄弟情比单飞赚钱更加珍贵。」

NY坦言呢半年用咗五位数追梦，参赛日子身心都好攰，无非为将来铺路：「晚晚搭的士返屋企，用钱买休息时间。家人好支持我，参赛期间舅父仲塞零用钱畀我，够我坐的士，真系好窝心！」NY自爆系屋邨仔，同家人住紧井型公屋，目前生活只够钱食「面包」：「所以一定要努力，唔努力支持唔到自己，我目标同喺屋邨出身嘅坤哥(吴业坤)一样住好啲，希望喺25岁前可以搬出去，不过，𠵱家做到自己锺意做嘅嘢好开心，暂时仲有时间去任性。」