【独家】睇好嘉欣攞视后赖慰玲拎女配黎耀祥期待四夺视帝

2021-01-08 00:15

拍剧34年嘅黎耀祥眼光独到，去年喺台庆颁奖礼前夕接受《头条日报》访问时，贴中晒视帝马国明及视后惠英红，今年他凭《杀手》「阎武」再角逐视帝，问到第四次封帝成数时？祥仔笑说只有五五波，同《踩过界II》王浩信有得挥！取决系评审同观众口味，他拉票说：「我卖点系除衫同埋拍打戏，畀到小小惊喜观众罗！」采访：方骞平摄影：张咏森

黎耀祥同TVB只系合约演员关系，但落力程度同「亲生仔」冇分别，最近为拍新剧《拳王》一场打擂台戏操到8块腹肌，身形较《杀手》的钢条身形更Fit。日前祥仔跟朱敏瀚及赖慰玲拍一场街景戏，原来赖慰玲好怕祥仔，形容成个行头最惊系佢，感觉佢眼神可以睇穿一个人，赖慰玲笑说：「以前望住佢拍《财神驾到》惊到震，𠵱家叫做招架得住，不过，喺佢身上学会不断求进步。」

贴徐荣夺男配
黎耀祥就话睇好赖慰玲凭《反黑路人甲》攞到女配，赖慰玲吓到口震震回应：「有前辈赏识，真系好过攞奖，奖项呢啲预计唔到，平常心。」至于56岁祥哥咁落力拍《杀手》及《拳王》，TVB系咪要畀返个奖嚟鼓励吓？他笑说：「咁又唔使，有咁好剧作，自己都有满足感嘅，当然都恨有奖，因为奖项系个鼓励。事实上我同龚嘉欣喺《杀手》都几突出，嘉欣都好大机会勇夺视后，因为公司入面，唔系有太多女艺人咁搏同埋咁打得。至于王浩信盲侠个角色几得意，而观众会睇埋佢整体拍剧嘅表现，佢喺《反黑路人甲》都唔错。至于男配以徐荣《反黑路人甲》睇高一线，他演得比朱敏瀚放。」