【独家】破叱咤记录 　网民热讨成社会现象 姜涛开心能令港人再留意乐坛

年仅21岁的姜涛，上周破纪录成为最年轻「叱咤最喜爱男歌手」及「叱咤最喜爱歌曲」双料得主，连日来不单止娱乐圈，就连政界及KOL界纷纷加入讨论，热烈程度拍得住香港乐坛辉煌的8、90年代，更被冠以「姜涛效应」。估唔到自己成为引爆社会热烈讨论导火线的姜涛，接受《头条》访问时再现天然呆搲头样，不过有MIRROR队长Lokman（杨乐文）傍住个心定啲，定神后答得劲得体，「希望因为我，大家更加关注呢个乐坛。」讲到早前中风的姜爸，姜涛开心得奖后爸爸身体好转，不过讲到同爸爸关系，他突然超搞笑大爆父母家事，就知姜Ｂ其实仲系个细路仔，大家畀啲时间佢成长啦！撰文：杜淑霞 摄影：谭壹致 服装：initial Fashion

得奖后过了几日，姜涛承认沉淀一阵终能接受事实，「都觉得唔好再讲自己值唔值得攞，既然攞咗，好似头先队长所讲系鞭策！外界畀你嘅肯定，系令你进步嘅动力。」讲到洗版式讨论，他坦言冇谂过，「有咁多人出嚟去讲，都好开心，其实我一直秉持住无论锺意我哋，或者唔锺意我哋都好，去批评又好，鼓励又好，只要你肯讲令我哋知道就得，我觉得最悲哀系冇人肯去讨论，一个Artist又好，乐坛又好，所以好开心大家讨论，希望大家以后永远都讨论落去。」



不过原来姜涛以为讨论只限于娱乐圈，提到连政界及KOL都加入讨论，转发其「用自己作品保护自己粉丝」的post，更有人拿他与哥哥张国荣相提并论，延伸讨论到8、90年代的香港乐坛，他即时再现得奖时天然呆反应，边搲头边话：「系咩？唔系娱乐圈嘅层面咩！？已经……哗！咁呀！」此时队长Lokman主动出手打救，「佢点解攞得到呢个奖，一定会有佢嘅原因，有啲人攞哥哥嚟同佢比较，就系讲紧时代唔同，呢个大改变大家未必一下接受得到，所以会有咁两极讨论，但当大家讨论时，即系想正视呢个问题系好值得去讨论。」定神后姜涛再补充，「因为我引发呢啲讨论，希望讨论更加关注呢个乐坛。唔敢讲自己有呢个能力去开创（时代），但系我希望我哋呢一班，无论系MIRROR又好，香港以后出现嘅新人都好，希望慢慢去令大家改变睇法。」

自爆家事劲搞笑


姜涛坦言有留意8、90年代的香港乐坛，仲好肯定话对该年代歌曲「一定熟」，咁叻当然要考吓，于是问他5首当年名曲包括：张国荣《侧面》、陈百强《等》、梅艳芳《赤的疑惑》、罗文《几许风雨》及林子祥《敢爱敢做》的原唱歌手时，他只答啱《等》是陈百强唱，《侧面》要工作人员提水先识讲张国荣。未能顺利过关的他解释：「我识嘅都系四大天王嘅歌。」



讲到MIRROR对姜涛得奖感受，Lokman话大家都超开心，仲案件重演当晚感受，「佢攞第一个嘅时候，系哗！攞第二个嘅系哗！！（姜：我嗰吓好想拉佢哋上台，我觉得自己搞唔掂！）我觉得佢处理唔到得嚟，都处理得好好，佢一开咗个头，唱咗几句（歌）就入咗去，系叻仔嚟嘅！」听完队长赞，姜涛开心话：「系归功于《全民造星》嘅时候，我哋经历过各种唔同嘅舞台。」Lokman认为就算姜涛被踩对MIRROR都有帮助，「我好衰咁讲，好多人喺佢攞奖嘅时候踩佢，啲人都会留意边个系佢，佢系属于乜嘢，都会记得埋我哋。」



姜涛又透露爸爸在他得奖后身体好转，「我攞完奖佢开始好番啲，唔知系咪因为心情好咗，由行唔到，到𠵱家行到路，今日有去照磁力共振，都好番好多。」讲到同爸爸关系，他忽然大爆家事，「细细个好黐阿妈，同爸爸关系一直唔系好close，爸爸妈妈关系都系吵吵闹闹过一世嗰啲，我一直都帮住妈妈闹爸爸，不过到大个知道我阿妈呢个性格的确系比较难搞少少，所以渐渐理解我爸爸，大个咗之后，有倾番好多偈。」入行后他更加会跟姜爸倾心事，但本来想报喜不报忧的他，结果输畀个电话，「无谂过佢哋用电话用得咁叻，当初电话系我教佢哋用，佢哋𠵱家识得自己search facebook 同ig呢啲。」