【韩星齐玩雪】防弹RM同雪鸭组「DTS」 Jennie 瑟琪雪中兴奋弹弹跳

2021-01-07 16:00

韩国近日天气寒冷，今日首尔的最低气温更只得零下19度，冻到打冷震之馀仲要落大雪！虽然香港冇机会见到落雪景象，疫情下亦冇办法出国感受落雪，不过睇住一班韩星玩雪玩得咁开心，惟有睇咗当去咗啦。

RM@防弹少年团
防弹少年团队长RM虽然冇Post出自己嘅相同片，不过一啲都唔输蚀，佢用雪整咗7只工整嘅鸭仔，再一字排开。RM更留言指鸭仔们系「DTS」，即系鸭仔版嘅防弹少年团，连玩雪都惯住一班队友，呢位队长真系好Warm呀。

Jessica
少女时代出身嘅Solo歌手Jessica Post出身处瑞士嘅旧相，蓝天白云加埋雪山景真系无敌。Jessica搞笑表示好挂住《魔雪奇缘》嘅雪人Olaf，更在限时动态用一张Olaf嘅GIF图就话对方「嚟咗」，有睇完相当自己去咗旅行嘅Feel喎。

Jennie@BLACKPINK
BLACKPINK嘅Jennie喺一片好厚嘅雪地上影相，头顶有飘雪好浪漫，唔知佢系咪搵到隐世雪地呢，竟然只得Jennie留下嘅几个足印！平时喺舞台上够晒霸气同Cool嘅Jennie，见到落雪都开心到弹吓弹吓，反差够晒可爱。

瑟琪@Red Velvet
同舞台上好大反差嘅仲有Red Velvet嘅瑟琪，佢都忍唔住喺雪地弹吓弹吓，仲开心到转咗个圈，除此之外佢仲影到一张雪花大大片飞落嚟嘅靓相。贴心嘅瑟琪更留言提醒大家小心雪地，人靓心更靓。

姜丹尼尔
限定男团Wanna One出身嘅Solo歌手姜丹尼尔就拍咗个小小嘅Vlog。佢先表示外面落大雪，镜头一转姜丹尼尔已经换好御寒衣物，亲身上阵话要教大家整雪天使喎！原来大字形瞓喺地下再不断郁动手脚就可以整到，Cute到呢。

辉人@MAMAMOO
唔知韩国系咪除咗堆雪人都流行堆雪鸭呢，无独有偶MAMAMOO嘅辉人都整咗好多鸭仔，仲排满一整条栏杆！鸭仔嘅Size十分迷你，只有手心咁大，成功将所有鸭仔放上栏杆之后，辉人同朋友开心到系咁欢呼，好搞笑。