【独家】细诉创作《造星III》作品感受 顾定轩绞尽脑汁：多咗白头发

既然大家咁锺意Zeno（顾定轩），《头条》当然识做，将Zeno专访其他精彩内容大公开。Zeno在《全民造星III》有份参与的小组作品，获得评判、观众和网民一致赞赏，讨论度极高，原来为了有更精彩的演出，他真的绞尽脑汁，26岁的他感觉这短短5个月，似急速老化5年，他更自爆因而多了白头发，认真惨惨猪罗！撰文：杜淑霞 摄影：李维隆 发型：Faust @ the attic 化妆：mon 场地：夕拾x闲社

Zeno由7月开始参加《造星III》，觉得时间过得好快，想不到眨下眼就到12月，仲觉得自己衰老了，相当搞笑，「好似过咗好耐，好似过咗5年咁。（有冇老到？）我多咗好多白头发，唔系我自己发现，系我啲朋友系咁讲，我发型师都有啲诈型『你系咪谂太多嘢，你不如唔好谂咁多嘢啦！』我谂因为喺《造星》入面要绞尽好多脑汁，因为每一round都好短时间，要完成好多嘅作品，每日谂好多idea，每分每刻都喺度谂。」



谈到Zeno有份参与的多个小组演出作品，都得到外界激赞，他也觉得辛苦得来，特别开心及有满足感，「我喺呢度搵到好多唔同嘅嘢，譬如表演系咩？又重新定义咗其实自己身份系乜嘢，以前系个演员，嚟到呢度就系想试啲唔同嘅嘢，结果真系试到跳舞、唱歌，可以将戏剧嘅嘢摆喺舞台上面，自己系好锺意每一个作品。开头都担心自己迫自己做一啲自己唔擅长嘅嘢，自暴其短，你又唔系唱歌特别好，又唔系识跳舞，唔好攞自己嚟搞，但系又胆粗粗去参赛。自己一向都系咁，我行演戏呢条路都系咁嘅心态，试吓罗！放手一搏，想做就去做，我觉得冇后悔嘅，冇谂过真系可以搵到啲新嘢出嚟，可能以往《造星》见到嘅作品，比较多唱歌同跳舞，今次就算有人系擅长唱歌、跳舞，但摆多咗戏剧嘅原素入去，同埋大家接受喺电视舞台上，仲有内心好多情感，或者一啲故事剧情。」

似成长一课


众多《造星III》演出作品中，要Zeno拣一个最喜爱项目，他想了想最后拣了观众都劲like，大赞感动的《给十年后的我》，他认为项目意义重大，亦是他比赛的转捩点，「好似成长嘅一课，因为自己想嚟试新嘢，但过程入面好多紧张同包袱，唔系放得太低，始终自己以演员身份入嚟，有啲压力，我系一个好幸运、有好多机会嘅人，人哋睇你个standard会高咗，压力会影响咗创作，会局限咗自己，但系《十年》呢个主题，真系放低晒所有嘢，唔可以有一丝保护膜，唔可以再戴面具，搵番我哋最原本嘅自己，过程我哋每日都喊到缺堤，我哋称每日都系『眼泪放题』，节目剪出嚟只系一少部份，我哋系喊到七彩，但唔系唔开心，系感动，原来我哋有时太过横冲直闯，好似一生净系得一个目标，可能错过一啲经过嘅人，唔记得自己初心，呢个作品可以有个休息时间，呢个逗号好紧要，令我搵番我之后嘅动力，之后更加有信心去行之后嘅路。」



至于《Wish》及《我们》两个高口碑的项目，Zeno就最锺意《Wish》的创作过程，「《Wish》系最original嗰5个队友，凭空去构建一个故事同表演出嚟，我哋都觉得有啲沙石，但系第一次第一队嘅同伴，活生生唔保留唔怕丑讲自己谂法，成就咗呢个作品，可能唔完美，但过程好开心。」至于《我们》，他觉得是作品中，最大挑战的一个，「喺大众平台上用咁样题材好大胆，我自己都有啲关口要过，我一直都有演过类似角色，点样可以转化成观众可以理解，某程度大家知道我演过类似嘅角色，对我要求又会再高啲。虽然我同Manson系男主角，但系最大主角系『我们』每个A组成员、『战狼十一』，呢个故事唔系单单讲我哋两个人，系讲每个人心目中都有啲错过咗嘅人，有啲遗憾，未必系人可能系事，每一个人都有我哋嘅『我们』。」