【独家】分享丧妻心路历程为同路人打气 林子博变身心理医生

分享丧妻心路历程为同路人打气 林子博变身心理医生 林子博上周六（19日）为《头条开Live》出任嘉宾，今次主题系《「董」得好生活-生命战士的奇迹》，子博跟小董中医博士及癌症病人惠珍分享患病及中医治疗经历。今年嘅冬至，正值太太董燕君离逝两个月，因为肯讲肯同人分享，子博渐渐走出丧妻阴霾，甚至做埋同路人嘅心理医生，未来他乐于参与一些单亲分享会，和家长们互相交流，支持及打气。 采访：方骞平 摄影：李维隆

做惯主持嘅林子博喺直播期间反客为主，追问作为医师嘅小董博士如何面对家人患癌呢？岂料搞喊小董医师，原来她婆婆年前离逝，至今她仍未释怀。事件中令子博得到反思，「其实由太太患病至离开，我几乎每次做访问都会喊，只不过爆喊次数会愈嚟愈少，因为渐渐好似变咗讲紧人哋嘅故事咁，好似抽晒入面啲瘀血出嚟，会冇咁辛苦，医心病好重要。」

子博最近更变身心理医生，成为同路人主动倾诉对象，「最近有个怀疑医疗失误，丧妻嘅男士私讯向我求助，我就即晚去咗佢屋企，大家坐喺天台『吹水』，其实话题唔特别，有心灵寄托就够，希望未来都可以帮多啲人，尤其单亲家庭，因为喺我囝囝11岁呢个年纪，父母都因为离异，我生长喺单亲家庭曾经学坏畀警司警诫，关心单亲子女相当重要。」

现在子博跟子女会经常分享生活点滴，他更从子女口中，会听返一啲未听过嘅说话，譬如老婆曾同囡囡讲私密，话她走后，爸爸会好快有女朋友！子博听完都笑咗出嚟，「佢(亡妻)实在太低估佢对我嘅影响力，同埋太高估我嘅魅力！子女对我最重要，第时嘅女朋友首要爱埋佢哋。」