【独家】太太两周前已签同意书拒绝急救 林子博喊住提老婆心愿:「仔女长大要照顾爸爸」

昨晨，去年确诊罕见癌症「平滑肌肉瘤（腹腔）」的林子博太太董燕君（Shirley）不敌癌魔病逝，子博在社交平台写下情深字句送别爱妻，一字一泪。早前子博为太太搞网上众筹干细胞治疗医药费，可惜完成4针第一个疗程后，对太太效用不大，离世前的肝、肾、肺肿瘤变大，影响排毒功能，出现腹水及水肿等症状。子博上周接受《头条日报》访问时坦言老婆在两周前已签同意书拒绝急救(不能康复的仅维生治疗)，兼愿意捐出眼角膜遗爱人间，子博相当无奈忍唔住流下男儿泪，讲到太太心愿，子博难过透露，「希望子女长大后要照顾爸爸。」采访：方骞平 场地：eliment Fitlax

临终前董燕君因为严重腹水及水肿再次入院抽水，仲要吊蛋白针补充营养，当时子博坦言相当担心：「其实佢个肺、肝、肾一直都有事，但𠵱家严重咗，要闻氧气同埋抽腹水，腹水顶住又痛唔想食嘢，佢一咳，全家好紧张佢，总动员去照顾佢，同佢摸背，畀佢闻氧气」因为要贴身照顾，所以子博在家不能离开老婆三步以外范围，亦理解到病人会特别嗲。

提老婆想放弃即喊
当时子博坦言好奇怪，觉得太太好似觉得自己出唔到院咁，「上次佢入院，医生指佢身体太脆弱，有乜事做心外压会压爆佢啲胸骨，所以经已填咗拒绝急救书同埋决定捐眼角膜。」子博哽咽地说，「仲谂住，又唔好咁快咁消极，我哋仲有好多方法未试，好似中医！当然我好欣赏佢呢份遗爱人间嘅情操。太太话，佢身上太多肿瘤，好多器官捐唔到，惟一可以捐到眼角膜，既然有咁多人帮过佢，佢都好想唔喺度时帮返有需要嘅人…我唔系好想听到同唔系好想面对，因为好难面对…。」语毕，一直强忍泪水的子博即拎纸巾抹眼泪。

娱圈朋友送礼问候
待情绪稍为平伏，子博再说：「我有同仔女讲过，无论太太喺唔喺度都好，我都要维持个家。其实太太知我系有主见嘅人，好放心交头家畀我，太太亦有同仔女讲，叫佢哋大个之后，就算结咗婚都要照顾爸爸。」当时子博提到未必再做第二个干细胞疗程，但都好多谢伸手帮他的每一个人：「小恩子搵朋友送嚟轮椅、拐杖、冲凉凳及氧气机；古巨基、马浚伟、何英伟等出钱支持，田蕊妮登门打气，甚至有小朋友话捐出一百几十零用钱，真系好感动，娱乐圈有情，人间有爱。」

做节目向难度挑战

去年林子博老婆董燕君患重病，之后到他不获TVB续约，子博要独力撑起头家，所以努力Keep Fit拍摄8集真人骚节目《大叔要变身》，记载属于他的感人故事，太太仲会抱病出镜为他打气。首集节目已于10月11日晚在香港开电视77台播出，由于节目调动关系，第二集开始改于逢周六下午四点播出，子博首次孭起一个节目，对他意义重大：「因为太太担心我冇工开，所以由佢搵导演速成件事。除咗会陆续请嘉宾，我仲会玩直立板，滑翔降伞向难度挑战。」问到会否担心玩到受伤？子博即以「该死唔使病」作回应，「要珍惜每一日，活得精彩，欣赏身边人优点。」