【独家】朱智贤赠「帽」 被网友赐花名耻笑 谢东闵百毒不侵：佢哋锺意啦

谢东闵最近在剧集《香港爱情故事》饰演情场浪子艺术家「Heyman」，背住女友同王敏奕大搞一夜情。剧中大演贱男的他，现实就暖男到爆，因女友朱智贤被爆拍剧暗挞人夫黎振烨，他仲陪住女方公开道歉，被封「绝世好男友」，但同时亦被网民狂踩，更耻笑他是「绿帽侠」。对于种种批评谢东闵坦言百毒不侵，「我比较承受到呢啲嘢，佢哋锺意点讲咪点讲罗！冇乜所谓！」他仲讲明视朱智贤为结婚对象，又否认是「绝世好男友」，反而自称是「麻烦男友」，因性格火爆好容易发脾气，令女友经常受气。撰文：杜淑霞 摄影：李维隆 发型：jay @hair 服装：mistergentleman

对于今次贱男角色，谢东闵认为好有发挥，至于跟人妻王敏奕有不少牀戏亲热戏，虽然相信大家都好专业，但慢热的他难免会尴尬，「尴尬嘅系我比较慢热，第一次同敏奕拍锡戏嘅时候，我同佢讲点演点演嘅，佢跟住喺度笑，问我使唔使讲咁多呀？因为我系男仔嚟，我都想畀佢知会点演，费事大家有啲咩误会啦！到头嚟佢仲放过我，咁就OK，唔谂咁多大家都好专业。」



原来拍亲热戏前，谢东闵都习惯同女友朱智贤「报定案」，「我觉得尊重都要讲嘅，敏奕可能都有同老公（曾国祥）讲。」问到会否睇女友演亲热戏？「我都好少睇嘅，（会唔会避开呢种镜头呀？）都会嘅。（女友呢？）佢都唔睇我嘅。（系咪个心会觉得唔舒服呢？）唔想睇咪唔睇罗！个吓想睇就睇罗！但我通常唔睇嘅。」



讲到朱智贤暗挞黎振烨有冇影响两人关系，「发生咗咁耐我都忘记咗罗！其实最紧要大家开心，畀到大家正能量，欢乐同健康嘅，所以大家会喺社交网站见到我哋有时一齐去行山嗰啲，大家都系做一啲健康嘅嘢。（系咪视佢为结婚对象？）暂时都系嘅。（几时结婚？）等事业再稳定啲先，同埋结唔结婚对我嚟讲唔系咁重要，因为一张纸嚟嘅，将来觉得有需要咪做，但系暂时呢一刻又冇乜特别需要。」

自称「麻烦男友」

对于被封「绝世好男友」，谢东闵反而自称是「麻烦男友」，「我唔系一个好嘅男朋友，听啲人讲咩『绝世好男友』，呢个世界边有『绝世好男友』㗎！？每个人都会做错，都有缺点，同埋每一对情侣或者夫妻相处系在乎大家去迁就，配合罗！人同人行得太近，一定会有磨擦，在乎大家点样包容对方多啲。（你讲过女友值得你帮，点解？）因为嗰阵时佢系我女朋友，我要支持佢罗！呢个条件已经够啦！我系个麻烦男友，要人迁就，我个人有啲脾气，但我爆完又好快冇事，有时佢会食咗我啲脾气，所以绝对唔系『绝世好男友』。」



对于俾网民狂踩仲被封「绿帽侠」，谢东闵冇乜感觉，「我本身好少睇留言，我反而好承受到出边嘅压力，我冇乜感觉，系我行我素嘅人，被宠坏的人，有时我都唔系好听人讲嘢，哈哈！我好似会喺第二个世界里面咁，我比较承受到呢啲嘢，佢哋锺意点讲咪点讲罗！冇乜所谓。有啲人好介意舆论嘅压力，我又OK喎！我系百毒不侵嘅，好似喺平行时空，我真系几适合呢行生活㗎！第一我唔系好理人哋讲乜嘢，第二我又唔系好出街嘅，我唔会俾人影到啲乜嘢嘅。」



对于年尾颁奖礼信心，谢东闵觉得一切随缘，反而更重视外界观感，「我最想俾观众觉得我系一个好演员，喺公司里边或者行内嘅人觉得谢东闵系一个好嘅演员，呢个系我自己最想追求做到嘅嘢，比一切更重要。」为了专心做好演员，刚为《香港爱情故事》跟戴祖仪合唱插曲《逆流直上》的谢东闵，更决定暂时搁置唱歌事业，「其实我两样都好锺意嘅，但系你呢一刻叫我拣，我当然拣做戏啦，因为我自己花咗10年时间落去做戏，所以我唔想浪费呢10年嘅经验，想再俾多啲心机去做好啲，嚟紧一路拍戏都未必有时间练歌，我又唔想将自己唔系最好嘅一面畀观众睇，咁我不如专心做戏，将来有机会先再唱。」