【独家】笋盘女友 荣升千万业主 31岁龚嘉欣拒绝被包养

31岁龚嘉欣和33岁罗天宇最近在剧集《香港爱情故事》，首度做情侣，演一对拍拖7年因土地问题冇地方温馨，搞到要「爆房」的拖友。剧中两人劲多亲热牀戏，对住被动拍档天宇，嘉欣笑指要化身「饿女」先搞得掂，好鬼尴尬。现实中两人一样面对土地问题，同家人租屋住的天宇，好羡慕啱啱上车买935万楼做业主的嘉欣，嘉欣就自揭入行10多年便成功储到7位数做小富婆。讲到绯闻，天宇提到经常被拍到约会的戴祖仪，即口窒窒否认，啱啱升呢男一的他，仲斩钉截铁话：「我唔做啲阻碍工作嘅嘢！」讲到大马绯闻男友Bryan，嘉欣表现大方，澄清只属工作关系朋友，提到包养传闻她更强调：「我绝对唔会，呢个我好肯定，我真系可以比你（天宇）肯定100倍。」撰文：杜淑霞 摄影：李维隆 发型：Real Law(嘉欣) 化妆：Herman Ng(嘉欣) 服装：Kate spade(嘉欣)、Theory(天宇)

剧集甫开播，嘉欣和天宇便上演「爆房」戏，他们承认初次合作便要拍大量亲热戏，绝对是顶硬上，嘉欣说：「一定尴尬啦！尤其是（爆房）嗰场戏系我哋嘅服装上，已经唔系着我哋平时casual wear，跟住又讲我主动嘅。」嘉欣仲大呻，因天宇性格太被动，要演拍拖7年情侣令她有点吃力，「夹硬嚟罗！我好似『饿女』咁，不停好热情咁样去做，希望可以燃起佢嘅内心啦！（罗：我缺货！）我咪主动啲罗，嗰时都真系惊人哋误会嘅，以为我做咩事呀，系咁成日同佢讲，叫佢一齐食饭。」




讲到剧中人遇到的土地问题，两人坦承都身同感受，天宇说：「我同细佬嘅目标好清晰，就系快啲谂办法置业，买个地方，唔使再租屋呀！所以我睇剧本嘅时候，真系自己想讲嘅对白，你唔需要去谂㗎！租屋定买楼系好贴地嘅对白，出街嘅时候大家都应该好有共鸣，所以希望呢啲位会吸引到观众。」

讲戴祖仪口窒窒


天宇坦承对嘉欣年初已上车买935万500多尺单位做业主劲羡慕，嘉欣即公开储钱大法，「我开咗ABC三个唔同户口，出粮就将钱打散，因为我本身理财同数学都好差，我留一啲钱喺Ａ户口畀自己用，唔够先至喺B嗰度攞少少，但系C嗰个户口系永远唔郁㗎！而家全部Online转来转去啲钱好容易，咁我转过去冇睇佢有几多钱，就系咁样储到钱。（几多岁开始？）我做Model嘅时候已经开始，我冇乜物质嘅欲望，我买完嘢冇乜感觉，就知我系唔锺意使钱，尤其入咗行好多客有sponsor，开心可以悭到钱。」16岁初次当相机广告模特儿，嘉欣已有5位数收入，所以10几岁已储到20万，令到20几岁已定下30岁买楼计划，「20几岁嘅时候偷睇过一次（C户口），已经储到7位数，而家层楼有500几尺，两个房，我好心满意足㗎啦，我唔贪心。」原来嘉欣仲有班auntie做幕后军师，「佢哋会分析应该攞资产几多比例去做投资，我而家仍然揸住紧嘅，有一啲保险、基金嘅嘢，我谂第时40几岁会几有钱。」



声称现在单身的天宇，谈到经常被拍到跟戴祖仪约会，他口窒窒回应，其间不停用眼神向嘉欣求救，嘉欣亦搞笑话：「你做咩望住我呀？！」他解释只是揸车顺路接送埋戴祖仪，「唔通叫人哋去坐地铁咩，而今次影到，之前我哋一齐做啲（音乐）cover啫！」他仲话想努力工作储钱买楼，今套剧有机会升呢男一，会好好珍惜机会，仲斩钉截铁话：「唔拍拖啦！唔做啲阻碍工作嘅嘢！（嘉欣笑：唔好下巴轻轻呀！）」



对于有传跟大马男友Bryan拍拖一年后分手，嘉欣倒答得大方，讲明根本冇拍拖何来分手，「佢嗰时搵我做啲活动，传媒登嗰啲相，我经理人其实都喺度。」嘉欣坦承看到身边朋友好似陈凯琳等，有个幸福家庭都好羡慕，希望下次拍拖就是结婚对象，不过她仍想事业再冲刺，暂时唔心急拍拖。不过讲到被包养传闻，嘉欣讲明坚决拒绝，「我绝对唔会，呢个我好肯定，我真系可以比你（天宇）肯定100倍。