【维港会】介绍朋友入职竟常迟到「射波」 事主呻与上司关系变差

返工有朋友一齐的确几开心，多个人陪，又可以得闲吹下水，但系如果个朋友问题多多，仲令到自己同其他同事关系变差，都真系几麻烦。近日，有事主介绍朋友入自己间公司做，但朋友竟日日迟到，更一个月请4至5日病假，令事主同上司关系变差。

事主于Facebook专页「办公室日报」投稿，指自己永远都唔会再介绍熟人去自己公司做。她指今年年初与朋友食饭时提及公司请人，其中一个朋友Jade表示有兴趣，于是叫事主介绍。入职后不久，Jade已经常迟到，其他同事问事主「喂，你个friend仲未返嘅？」，令佢觉得自己好似监护人，Jade仲成日将事主的私事同其他同事讲「唱我之前畀条仔飞，又话我同父母成日闹交，连我经期唔准都周围同人讲」。到佢忍唔到同Jade摊牌，Jade只是回覆「好小事咋喎！好啦好啦！下次唔讲。」

直到有一次Jade连续请咗4日大假，好多同事问网友，Jade发生咩事，结果Jade竟然同网友讲「我搵咗份新工呀！谂住no show几日等炒」仲讲明唔想赔钱畀公司。

事主当时与其他朋友商量后打算第二日与上司讲，点知原来Jade已经私下同上司讲，「仲系反晒面泼妇駡街嗰只，佢同上司讲唔会赔人工，会选择旷工直至公司炒佢」，Jade仲同上司讲事主已经知道，搞到「上司对我嘅印象已经好差，直至呢一刻，我同上司嘅关系已经修补唔到。」

不少网民纷纷替事主可怜，指「睇到都好嬲」，「好人难做」。亦有不少网友指曾有相类似的经历，「我试过介绍朋友入公司，比佢唱到体无完肤。佢做左2个月，老细叫我小心佢，佢唔会系我朋友，仲叫老细炒左我。」，及「我都系以后都唔会叫识嘅人做同公司，10次有9次都会出事」。