【独家】自认入厨冇天份　 蒋祖曼拍节目搵老公帮拖

蒋祖曼（Joman）跟导演老公陈卓麒，日前首次以夫妻档为香港开电视节目《30分钟大放餸》出任嘉宾，即场大显厨艺。Joman自爆本身对入厨完全冇天份，平日三餐全靠老公及家佣姐姐搞掂，所以今次节目一定要搵老公帮拖，否则一定出事。讲到首次夫妻档演出，两人都话几好玩，唔排除再合作。采访：杜淑霞

最初节目邀请Joman时，已即时想到要搵老公帮手，「我经理人知我唔系好煮到嘢，不如叫埋老公帮手，我问佢（老公）冇应我嘅，我话『你唔去，我死梗㗎喎！』跟住佢话唔系唔嚟，谂吓先啫！」阿麒解释，「因爲我未做过烹饪节目，平时都喺自己厨房自high玩，怕啲观众见到话唔系咁煮㗎喎！（Joman：哈哈！佢谂得太多嘢。）」



Joman坦言：「我系锺意食，但系唔系咁锺意煮，煮饭嘅过程我唔系好享受，整甜品我都系为咗食㗎咋！我系连面豉同豆豉都分唔到嘅程度，头先仲问点解用碌柚整猪扒，其实嗰啲冰糖嚟，所以我今日系抱住一个猎奇心态。」最终阿麒煮了「麻辣猪肉乾炒饭」、「蒜片牛柳粒意粉」、「面豉豆卜鸡柳炒四季豆」及「糖醋猪扒」。

唔介意再合作

阿麒解释最初都是焗住学煮餸，「我喺澳洲读书，挂住香港啲餸咪唯有自己煮，嗰时同屋大镬饭咁煮下煮下又几受欢迎，跟住到出埠自己住，咪喺间房整个小厨房，煮得多迷熟能生巧。」在疫情下，阿麒更加多下厨机会，Joman仲爆一对仔女就最开心，「平时佢要开工，个仔唔锺意我同姐姐（家佣）煮啲餸，所以佢放假最开心，可可（细女）仲会点餸，佢系啲大叔口味，锺意食咸蛋蒸肉饼同腊肠嗰啲。」



讲到夫妻档演出，Joman话其实两人未拍拖时已合作过，「嗰时我得17岁，我哋一齐做fitting model认识嘅，之后佢做幕后就试过一齐拍电影《围城》，但系幕前今次真系第一次，今次都几开心嘅，有机会唔介意再合作㗎！」