BB百日宴爆喊得多过囡囡 雨侨当妈真伟大：自己凑系值得

雨侨于8月8日剖腹诞下女儿罗约弥（Harper），昨日她与老公罗力威为女儿在酒店举办小型百日宴，并在社交网分享相片，撰写长文大谈凑女辛酸史。她说：「呢一百日佢喊得多，我喊得仲多，由每分每秒都唔知佢喊乜？总之就日喊夜喊，一日呕湿十几套衫，锺意就三日唔屙屎，到知道佢有肚风呀搓肚仔呀，人生目标短到净系想你捱过一餐奶，唔好三个钟头全喊，见到你成条蟮（鳝）咁fing（揈）嚟fing（揈）去，个肚一定好痛真系好阴功。」
雨侨续谓：「到而家基本上系我幻想中嘅BB食玩瞓，真系万水千山。为咗唔好嘈醒对方，总之谂得出嘅都试过晒，包括一个瞓一个匿喺㕑（厨）房抱住，因为㕑（厨）房最远。最长试过十四五个钟无离开过我心口，条颈同对手睇完医师马上又痛返，妈妈手已经唔理，系妈妈背妈妈膊妈妈全身，无数个夜晚抱住佢望住个天由黑变光，嗰种感觉真系难以形容，但系相信好多妈妈同我一样，会觉得自己凑系值得，同埋就算有人帮嘅妈咪都唔会舒服太多，可以抱就抱因为佢大个就唔使你抱，望住佢初生细细粒到肥肥白白识笑，真系觉得好幸福。」