【独家】出街大阵仗 囝囝有专属工人服侍　叶翠翠搞唔掂爆喊细仔皱晒眉

39岁的叶翠翠于15年下嫁建筑公司副董事周晓东（Raymond），婚后诞下3岁大仔Jake、两岁二仔Triton和细仔，完全停止幕前演出转型做KOL。上周六（31日）晚趁万圣节，翠翠和老公带3个囝囝去铜锣湾时代广场行街食饭，一家五口唔算大阵仗，但加埋三个工人就好大堆头。当日，大仔和二仔各自有专属姐姐贴身服侍，而翠翠就全程抱住8个多月大细仔，身旁亦有一个姐姐随传随到，见B仔喺翠翠怀中不断扭计，由商场扭到入餐馆，翠翠完全𠱁唔掂，难怪佢皱晒眉！采访：Dick

上周六晚上7时许，叶翠翠与老公带埋3名宝贝仔现身时代广场，同行仲有3个工人姐姐负责服侍「小主子」，认真大阵仗！虽然当日正值万圣节，但翠翠一家未有刻意打扮迎合节日气氛，只简单地穿上Casual wear，不过仔细一睇，原来两位大公子跟爸爸均以大嘴鸟白Tee衬短裤仔，大玩父子装。

细仔扭计
当日，众人先从底层的Citysuper走到地面排队，并搭Lift上位于食通天10楼的潮州餐馆食晚饭。今年2月剖腹诞下第三胎的翠翠，全程紧抱圆碌碌细仔又上又落，其间细仔不停扭计狂喊，估计系肚仔饿，够钟饮奶！抵达餐厅门口后，等紧位的翠翠仍未能及时喂B，唯有「印」住安抚囝囝；不过现场人来人往，B仔块面无遮无掩，万一附近出现「隐形播毒者」就认真弊家伙！等咗一阵周氏一家便获安排入座，Raymond先让一班细路及妇孺进店坐低，自己就推住架BB车殿后。

翠翠嬲猪
甫安顿好，翠翠即拎出奶樽让「三王子」在其怀内开餐，两位百厌哥哥就企喺櫈上爬来爬去；其间一对情侣向Raymond打招呼，并指向镜头示意有记者在场，未几店员都好识做，安排他们搬到较隐蔽的位置坐低，惟忽然被「断食」的B仔就喊到面都红晒！逗留约1个多小时，翠翠一家大细食饱步出餐厅，她礼貌地上前问：「你边间（报馆）㗎？」本报记者即报上名来，听罢她续道：「我哋好少出街㗎，可唔可以唔好跟住佢哋？唔好吓亲啲小朋友呀！」此时，3位工人姐姐急急拖住Jake和Triton乘扶手电梯落下一层，剩低的翠翠开始显得唔耐烦，Raymond就帮手推住BB离开。