【合体做live骚】黑妹送励志歌畀林子博老婆肥妈为老公不适爆喊

2020-10-12 20:17

2017年11月肥妈跟黑妹姐(李丽霞)曾喺新伊馆举行咗个《黑．妈妈笑住唱》香港演唱会，年多后两人入纸申请再做，原先批咗喺今年二月情人节档期合体，可是受疫情影响，两人早已取消booking，不过，观众一直都好期待。黑妹姐之前应邀喺肥妈youtube频道Easy cook度学煮餸，两人重提合体事，兴之所至话搞个live show，结果昨晚终于「找数」，两人喺乐队伴奏下唱足两个钟头，吸引二万多观众收睇，亦有观众课金点唱。肥妈尽显巨肺本色嚟演绎，黑妹姐虽然肺癌做过手术，但唱歌不受影响，反而戒烟后，仲显靓声。

当晚两人演绎观众点唱嘅经典金曲《故乡的雨》、《蔓珠莎华》、《梦想号黄包车》、《万水千山纵横》、《Monica》、《冰山大火》等，当肥妈唱到苏苪的《凭著爱》尾段时被歌词感动得爆喊，肥妈说：「因为屋企有人唔舒服会牵肠挂肚。不过，好多人锡我老公，屋企人又好团结，所以系开心眼泪，人嘅一生起起跌跌都系磨练，我哋一定要正能量，坚持撑落去，我老公一定得。」

原来患有肺癌嘅Rick因为腰骨有啲唔舒服去检查，照到脑部有微细粒粒压住神经线，医生惊塞住血管有机会脑充血，所以Rick两周电咗个脑10次，电疗后突然成个人down晒见晕，肥妈话老公好人好姐真系接受唔到，所以𠵱家她夜晚唔敢瞓照顾住老公，搞到面上长了压力疮。至于黑妹姐演绎励志歌《总有你鼓励》畀肥妈老公Rick及林子博老婆董燕君（Shirley），希望两人早日康复。