老公教囝囝讲客家话 胡杏儿大仔叫阿妈做肥杏儿

胡杏儿因为要返内地工作3个月，为怕太挂住两个仔，所以决定带埋一岁囝囝李奕霖（Ryan）同行。下周二就三岁嘅大仔李奕霆（Brendan）呢?因为大仔黐嫲嫲，所以就由老公Philip照顾。

Philip系客家人，平日会教吓小朋友讲客家话，都话老窦凑仔秒秒都有惊喜，寻晚Philip就上载咗段片到IG，片中Philip以客家话问Brendan几条问题，包括你叫咩名?你细佬叫咩名?妈妈叫咩名?你几多岁呀?然后教佢用客家话讲:「我系客家人」，全片最好笑系着住蜘蛛侠衫仔及带住蜘蛛侠帽仔，玩住手指，招招积积嘅奕霆仔讲嘅BB话，讲自己名好笑，讲妈妈名更好笑，胡杏儿变肥杏儿，Philip留言叫老婆唔使担心，喺杏儿不在嘅日子会努力训练奕霆仔发音，老婆回归之时肯定完美咁话，咦，想听吓喎。