【畀人闹要员工执餐死】酒店房大执位 陆浩明床上望维港食早餐

因为疫情影响唔可以去旅行，近月好多酒店推出Staycation 优惠，食宿套票劲抵，五星级酒店包一晚住宿同双人自助早餐都系2千蚊咁上下。以往一得闲就同女友陈诗欣(Ayan)去旅行嘅陆浩明(6号)都系咁Book酒店度假，上月尾喺港岛区酒店住完庆祝拍拖周年纪念，呢几日又再帮衬。

今日佢就大晒港女至爱打咭甫士，就系喺床上食早餐，仲留言，「Happy Friday 叹个靓早餐」。见到6号将食物放满张床，有夹饼，有生果又有面包仲有香槟添，非常作状，留意重点，张床完全贴近窗边，可饱览维港景色，乜而家啲酒店房嘅床咁近窗嘅咩?明显间房经过大执位，所以有网友见到张相忍唔住问6号，「其实你影依张相之前有无谂过令酒店员工执餐死架？」6号秒回:「放心，当然要自己执返好啦。」而森美亦留言，「睇麻甩佬真系..... 😂」暗示睇麻甩佬咁作状影相好难顶。