心仪歌曲被杨千嬅捷足先登　周慧敏宁愿演唱会冇主题曲

J2《我们的音乐时代》最后一集，主持许文轩（Edmond）邀请周慧敏（Vivian）及音乐人伍仲衡（Harry）成为压轴嘉宾，二人大谈相识到合作无间的关系，伍仲衡说：「早在中学时期已为周慧敏钢琴伴奏《天荒爱未老》，可惜当时未有合照，好彩上天对我不薄，畀我识到Vivian。」周慧敏说：「本身2006年啱啱识Harry，我好多年冇做骚，谂住造只新歌，不过一定要最锺意，最啱心水先至会录，当时Harry的确写咗首歌畀我，经过一轮考虑，到我话畀佢知我要首歌时，首歌已经卖咗，最后首歌变咗杨千嬅嘅《原来过得很快乐》，既然遇唔到一首自己好锺意嘅歌就不如唔出，所以嗰次就冇新歌做骚。」

谈到二人默契十足，周慧敏说：「我同Harry比较夹，准则都好相近，所以大家唔使拗。直到2011年开演唱会我哋先第一次合作，佢写咗首《无双谱》畀我，其实我对旋律好腌尖，但一听个Demo已经好锺意，好感动，佢嘅作品最令我毛管戙，到佢再写《咖啡在等一个人》畀我，我亦一听就滴咗眼泪。」伍仲衡说：「畀Vivian听Demo，佢冇感觉嗰啲系唔会覆，即刻覆我嗰啲Demo，真系好锺意，《无双谱》佢唔够2分钟即刻回覆我Email。」

节目中伍仲衡更谈及王菀之（Ivana），原来二人交情亦非浅，Harry说：「Ivana未做歌手之前，帮我唱咗好多Demo，大概十几二十首，佢喺加拿大读书，每年暑假返嚟香港都会帮我录，我就帮佢造Demo，佢就帮我唱Demo。另外我仲叫佢参加CASH流行曲创作大赛，当时佢喺加拿大，我仲帮佢冒签名填Form报名，大家都入咗围，最后佢攞冠军，我攞亚军（你输咗畀佢有冇啲后悔帮佢冒签名？）系喎！早知唔同佢交Form。」