【独家】主持10年终孭飞节目 许文轩感激一班音乐人帮手

许文轩（Edmond）入行做主持不经不觉已有10个年头，最近终首度孭飞主持节目《我们的音乐时代》，原来今次是他主动向公司提出，最难得内容公司任由他发挥，而他特别感激一班音乐人，好似雷颂德等好帮手，二话不说迁就时间接受他访问。曾参加新秀夺冠的Edmond坦言仍有音乐梦，但不一定要当歌手，反而好似今次制作跟音乐有关的节目，一样令他好有满意感。采访：杜淑霞

今次首度有属于自己的节目，其实都是Edmond自己争取机会，「自己都做咗主持10年，真系好想有自己嘅节目，而自己最熟识都系音乐方面，所以就同公司提议搞个音乐节目，譬如讲吓创作人同歌手之间嘅关系，又或者唱片店老板点睇依家同以前嘅音乐同唱片咁，公司就叫我做住先，储够料再睇吓点出。」

结果Edmond由搵料、写稿、访问、剪片全部一脚踢，花了几个月时间节目可以成形，「好多谢公司畀机会我，内容都畀我自己去决定，拍摄时好多音乐人第一句同我讲『乜𠵱家仲有音乐节目㗎嘛！』听见都好心酸㗎！香港嘅音乐节目真系买少见少，但系因为机会难得，大家都好肯帮手，好多人二话不说接受我访问，明明好忙都专登抽啲时间出嚟。」




当中最难忘的被访者之一，肯定是已移居英国的雷颂德，「我知道佢返嚟香港几日，其实佢日日都好忙，但系佢都肯抽时间帮我，嗰日佢明明录完音要即刻赶去机场，但佢宁愿朝早早啲帮我做咗访问先，再忙自己啲嘢，真系令我好感动㗎！」曾参加03年度全球华人新秀歌唱大赛（雪梨区选拔赛）获得冠军及最佳台风奖的他，坦言仍有音乐梦，「但我唔一定要做歌手，其实只要做同音乐有关嘅工作，我已经好开心，好似今次节目我虽然要一脚踢，但就好有满足感。」