【独家】两公婆陪囡囡公园踩单车 梁咏琪甜拖老公劲温馨

继「歌神」许冠杰、郭富城及陈奕迅分别开网上Show为港人打气及为业界筹款后，上周梁咏琪（Gigi）亦为建筑工友义唱筹款纾困。喺筹款Show上，Gigi笑言虽然目前唔可以去旅行，但「踏上草地已经好开心。」靓妈冇吹水，记者经常见到Gigi一家三口喺数码港公园玩，唔使钱又可以呼吸新鲜空气，更可以畀5岁半嘅囡囡Sofía放吓电，一举几得。话口未完，日前《头条日报》记者又见到呢个靓人混血家庭出现喺数码港，今次系陪囡囡踩单车，日落前离开，行返上车前，Gigi突然挨实老公再伸手摄落老公只手，一秒拖实好Sweet呀。采访︰谭壹致

梁咏琪点解会举行打气音乐会为建造业工友筹款？全因Gigi睇新闻见到工友就算疫情严峻仍坚守岗位如常工作，又因「禁堂食令」而被迫喺街食饭，Gigi看在眼里觉得好难过，所以就希望为工友出一分力，真系好人一生平安。

Sofía真系好得意
　　日前下昼3点，好锺意踏草地嘅GiGi同老公及囡囡戴晒口罩又去咗数码港公园玩，今次玩咩？两母女玩跑步掂树，玩法系向住树跑，跑几步然后掂吓棵树就完成，唔好笑，咁去公园梗系郁吓啦！之后两公婆就陪囡囡踩单车，踩咗一阵就冇踩，小妹妹好黐妈妈，人哋啲小朋友放电会周围走，Sofía就玩奔向妈妈再紧紧揽实，画面好Sweet，接近傍晚够钟走人，囡囡踩住单车走，Gigi就主动贴近老公再拖实慢慢行上车，好温馨呀！