【头条独家】浴室当红馆晚晚开「骚」 梁咏琪一讲家庭笑得好满足

睽违四年，梁咏琪(Gigi)推出首张概念专辑《PRELUDIO》，她化身「说书人」身份收录四套故事歌曲，其中《100层楼的家》讲述两口子组织家庭生活，简单满足就是美嘅道理。Gigi坦言是唱出现阶段的心声：「有咗家庭之后会追求心灵满足，明白好多令你心烦嘅嘢只系身外物。」采访：方骞平 摄影:谭壹致 发型：Nick Lam 化妆：Circle Cheung @ndNco 服装：Harvey Nichols 场地：柏宁酒店

自从有咗西班牙籍老公Sergio同埋5岁大囡囡祈淑菲（Sofia）后，梁咏琪既幸福又满足，开口埋口都系「我老公」同「我个囡」！她雀跃说：「老公同囡囡系我fans，可能佢哋冇得拣，因为我会喺屋企听歌，我听歌嘅时候，佢哋就好雀跃话『我哋又听』，我睇MV时佢哋又会睇同埋畀意见，所以老公同个女都识唱我啲歌，老公一定会赞我嘅歌，因为佢唔系好识得唱歌，觉得太太唱歌好好听，我成日一路冲凉一路唱歌，每当我唱完歌，佢哋会喺出面拍晒手，好好笑！你唔觉浴室有回音好好唱咩？可以好尽兴咁，当开演唱会咁唱。」

一家人食乜都咁开心
问到Sergio会否好似铁粉咁对她心心眼？Gigi即回答：「唔系个个老公都系老婆粉丝咩？锺意嘅感觉包括埋仰慕，正如会互相关注对方社交平台一样。佢哋锺意喺屋企听我唱歌多啲，就算将来有演出，都唔会咁高调上台合唱。」关于跟家人嘅生活点滴，Gigi开心讲不停：「做咗咁多年人乜都试过，以前买落好多嘢𠵱家变咗负担，疫情下都要断舍离，学会不一定要拥有，𠵱家做人、生活、思想简单咗好多，唔好谂得咁复杂，衣食住行够就算，同屋企人一齐食乜都好食，做乜都开心。」