【独家】盼为周志文刘佩玥作结婚歌 翟威廉强调自己唔系有钱仔

由翟威廉(William)、周志文及周志康创办嘅网上音乐直播节目Happy Live 成立3周年，终于推出首支单曲《不是富二代》。虽然开铺卖日本清酒，但William强调自己唔系有钱仔，他大笑说：「戏内我就系富二代，所以我冇遇过为钱而埋身嘅港女。」另他希望下次可以作一首甜爆结婚歌畀周志文及刘佩玥。采访：方骞平 化妆:Christy Lam 发型:Ken Yong 服装:County of Milan 场地：浪潮音乐室

Happy Live首支单曲《不是富二代》由翟威廉一手包办曲词，周志文及周志康主唱。William为处男作创作咗唔同嘅版本，笑言次次咁做就会蚀大本，他预告Happy Live新歌会陆续有来。至于下首歌会否安排周志文跟刘佩玥情侣合唱？周志文表示可以尝试吓，问到系咪想唱Sweet爆情歌？他笑住反问：「唔知作曲人有冇咁Sweet嘅心态喎。」翟威廉被质疑即笑问：「系咪苦命鸳鸯？落难情侣！定系结婚进行曲？咁我尽量想像吓...」

冇父荫勿灰心

讲到创作新歌概念，翟威廉透露富二代除咗金钱，亦代表咗特权及地位，「有啲人天生冇呢啲天赋本钱，所以首歌系唱畀输喺起跑线嘅人听，包括我哋三个，帮大家打打气。」周志康就话就算冇父荫都唔使自怨自艾，做人要争气。周志文说：「呢首歌用嚟回馈Fans，始终Happy Live做咗直播3年，都系唱人哋嘅歌，威廉好犀利，本来唔识作曲、填词，但佢用咗好短时间发挥异能。」

讲到翟威廉投资六位数开铺卖清酒，周志康即代William澄清非有钱仔：「大家眼中嘅威廉系香港先生，又官仔骨骨，有才能，周身刀，大家以为佢系有钱仔，原来唔系！」翟威廉即说：「身边朋友识咗咁多年，点会唔知对方咩底蕴呀？啲女仔一埋身就知我系流嘢，对我唔会有期望，如果第一次约会都冇弹开呢，一定系真爱，不过，唔排除有啲为咗收兵嘅！」