【独家】33岁唔恨嫁 自爆秘恋之谜 高海宁拣男人最憎多口劲show off

33岁的高海宁（高Ling）最近连出《杀手》、《迷网》同《反黑路人甲》3套剧，加上客串内地热播剧《三十而已》令人气急升，令她相信封胸收起性感密密拍，演出终会令观众留意。今次高Ling在《反黑》演爱黐有钱佬的女明星「Angel姐」，私底下高Ling拣对象好贴地，跟音乐人邓智伟秘恋5年分手后，她讲明拣对象唔可以口多多，就算有料有才华，都唔可以劲show off，要低调有内涵先至冧到佢。不过她直认唔恨嫁，对追求者好迟钝，再拍拖仍然会玩秘恋，因好怕放闪晒恩爱，抹杀自己工作努力。撰文：杜淑霞 摄影：张咏森 形象：wwchezw 发型：Hei (Essensuals Toni & Guy Hair Salon) 化妆：谚瞳小白 (littlewhite_makeup) 服装：PortsPure、Wandler 场地：Pier 1929@湾仔码头

对于连出3套剧，高Ling自言有少少矛盾，「开心之馀，又担心啲观众会唔会混淆呢？但3套剧系3个角色、3个造型、3种唔同嘅人物性格，所以我估观众都OK嘅。」以往样靓身材正的高Ling，经常会因外表令外界忽略她演技，搞到要封胸求存，但近年明显情况有改善，她都觉得好开心，「我曾经为咗呢样做过好多努力，又试过封胸，好多我觉得以为有用嘅嘢，我都做过晒，但效果唔系咁好，我都气馁过、沮丧过，但后尾觉得唔好理，瞌埋眼就演啦，反而个反应又几好喎，咁可能人生经历多咗，演戏嘅经验都多咗，有进步大家真系见到，所以我觉得无论点都好，努力真系有用。」


讲到令高Ling开窍要数佘诗曼的赠言，她凭内地剧《三十而已》爆红，更加引证阿佘这番话，「阿佘好多年前讲过一句说话令我记到𠵱家，佢话『唔好计较主角定配角，无论戏份多与少，你永远都系你嗰场戏嘅主角，你只要演好你嗰场戏，就算你唔多戏份，你做得好都会畀人睇到』呢个时刻系认证咗，譬如《三十已而》咁，9场戏咋，30几集，得4集有我，但系个反应好好呀！就系有两场戏佢哋觉得我演得好好，个角色就好爆！所以我好少计较戏份多唔多，系咪女一，唔会同人争。」

讲到秘恋5年的邓智伟，对于前度高Ling不想多讲，但拣新对象却答得大方，她认为外在条件都是空谈，最重要个人本质，「对于我嚟讲最紧要性格行先，对方身上一定要个特质，但唔一定系才华，譬如话个性格好善良、好顾家、好孝顺，某一啲特质令我好欣赏佢。」不过，有一种男人高Ling最憎，「我锺意一啲识好多嘢，好有内涵，但唔会讲出嚟，内敛啲，我唔锺意show off出嚟畀人睇嗰种男人，掉个车匙出嚟，话畀人听我揸呢种车，嗰种show off我特别唔锺意，我系锺意啲踏实性格嘅人，我谂同我性格似嘅。」她亦怕黐身男友，但会畀足自由度对方，「做得我哋呢行就一定需要空间，你冇得限制，唔准拍锡锡戏。我都唔系黐身嘅女仔嚟嘅，我亦唔会check对方电话，或者好干涉对方好多嘢，我成日觉得两个人一齐最紧要信任，咁样相处最舒服。」




既然唔锺意show off，就算拍拖高Ling都会继续玩秘恋，唔会公开放闪晒幸福，「次次出嚟见亲都会问，拍拖拍成点呀？我唔想系咁，我努力咗咁多年，我系想大家睇到我原来系识演戏嘅，可以做一个演员嘅。（唔需要大家祝福？）纯粹我嘅见解，感情呢，幸唔幸福开唔开心，就真系得你自己知，值唔值得都系得你自己知，所以我唔需要，结婚我当然好欢迎大家祝福我，但系拍拖嘅过程当中，唔系一定要show畀大家睇先叫幸福嘅。」不过高Ling冇定结婚限期，唔想为结婚而结婚，她更笑言对追求者反应好迟钝，「你真系要做到啲嘢畀我睇到先得。」男士们加把劲啦！