【独家】对曹永廉指「自己友」零回应 黄翠如被萧正楠拉去跑街仆亲
2020-08-27 22:50 
因为曹永廉喺网上群组，留言一句黄翠如系「自己友」，搞到翠如卷入颜色风波中，备受争议。连日来黄翠如只靠老公萧正楠「心灵鸡粥」默默打气，而她只管专心拍好主演嘅新剧《七公主》，对任何「颜色」新闻未有回应。喺二人限聚令前，黄翠如跟新人吴子冲喺北角宝马山拍一场跑步戏，因为手脚唔协调，所以翠如跑步跑得好专心。采访：方骞平 摄影：李维隆
近日黄翠如非常专心拍TVB新剧《七公主》，之前喺酷热天气下，由下昼三点几开始喺宝马山跑步径拍外景拍到零晨。当日剧情讲她打输官司，心情唔好，所以由吴子冲陪跑。
翠如手脚唔协调
现场所见，翠如跑步有气有力，但跑姿有点机械式，她解释：「其实我细个有学过跑步，但系我手脚唔多协调，跑平路都OK，跑斜路就唔好，费事整亲受伤啦！我老公就锺意跑步，仲会周街跑，之前佢捉咗我跑街，点知跑到第二个圈我就仆咗落地损咗，之后佢就唔敢捉我去跑。」至于吴子冲就视黄翠如系女神：「跑步径人多车多，工作人员要截车截人，我哋就要同时间竞赛，真系有少少压力，好彩有翠如指导，佢好好人，当然系我心目中嘅女神，应该话系紥住马尾做运动嘅女仔特别有气质。」
關鍵字
最新回应