【独家】自封万人迷 唔使玩争仔 冯盈盈转口味想嗒圈中成熟男

冯盈盈最近在剧集《反黑路人甲》首次做女一，饰演督察「Madam Koo」爱上卧底下属王浩信演的「张细伦」，仲要同6个女仔齐齐争仔。私底下，盈盈自从去年底跟拍拖4年的医生男友锺文浩（Martin）分手后，传过挞着郑衍峰，但她否认恋情。讲到同人争仔，盈盈直言冇「Madam Koo」呢个烦恼，更自封系万人迷，劲多追求者唔愁冇仔沟。不过，她强调现阶段唔心急拍拖，会了解清楚睇定啲先发展新恋情，仲话𠵱家搵对象反而转口味想拣圈中人，贪对方会明白工作情况唔使不停解释，但对方最重要思想够成熟，畀到意见支持她在圈中发展。撰文：杜淑霞 摄影：梁志明 发型及化妆：Kayo Wang@Kayo Makeup 服饰：MARYLING Swarovski、Malone Souliers 场地：The Stadium

今次在《反黑路人甲》盈盈首度担正女主角，本身是周星驰迷爱睇喜剧的她，本来有今次机会觉得兴奋又开心，但衰在经验唔够，畀自己超大压力，她自爆拍喜剧竟然拍到爆喊，「大家开心睇喜剧嘅时候，其实我系喺镜头不停喊，返到屋企背人就流泪啦！喺现场对自己有更大期望又忍唔住喊，唔知系咪我对呢套喜剧太投入，系拍剧以嚟喊得最多嘅一次。」


感激王浩信张振朗


盈盈呢段迷惘期，好彩经过王浩信和张振朗帮助好快过度，「佢哋愿意喺场口之间空档时间，唔休息攞嚟同我去排戏练戏，佢哋陪我做到捉到个感觉，再配合先roll机，畀咁大空间我，佢哋冇任何唔耐烦，好愿意帮我。」而张振朗私底下更message她打气，「佢畀咗啲鼓励说话我，『唔需要灰心同沮丧住，相信你会搵到你嘅方法嘅，拍戏最紧要开心，你先自己enjoy放松心情』好多谢佢，令我明白令人开心前，自己唔可以咁唔开心，要放返开心情。」


讲到剧中要同6个女仔齐齐争仔，盈盈话现实中会选择放手，「原因同角色系唔同，对方都系万人迷，好多女仔锺意佢要争佢嘅话，算啦我放手，因为我本身都系万人迷，好多人都会锺意我㗎嘛！咁样就无谓执着啦，又辛苦自己，勉强得嚟都冇幸福啦！（𠵱家系咪好多人追？）我觉得应该都会嘅，但系我仲好专心工作嘅关系，就熄晒呢啲雷达，冇话特别留意边个想追我、锺意我。」

有对象会照公开

问到现阶段的择偶条件，盈盈觉得最重要相处舒服，「以前细个通常会有啲特定嘅择偶条件，譬如我讲过要幽默、搞笑、听我话咁样，特别我𠵱家大个啲，经历多咗，人都成长成熟咗之后，觉得相处舒服先至系最紧要，其他啲条件都唔够呢样嘢重要，但系就真系要啲时间，一开头互相被吸引一定觉得做咩都好，但系真系需要时间考验同见证，先发现即使时间耐咗，大家都相处到包容到，咁先至系值得去开始嘅对象。」



盈盈坦承觉得圈中人会更适合她，因为容易沟通，「坦白讲从事番呢个行业会易啲明白大家遇到嘅难处，有咩需要，好多嘢我唔需要讲一大轮先至解释到，咁佢对个行业了解啲，有时我好迷惘，嚟紧唔知点行，佢都会畀到啲建设性嘅意见我，都几帮到我喎！（即系要成熟啲？）成熟好紧要，但唔系纯粹岁数，思想上先得，我希望个对象弥补到我一啲觉得缺憾嘅地方，例如佢会识得深思熟虑做好多嘢，因为我比较直率，凭直觉冲动做事，我毕业之后第一份工就系香港小姐，人生历练唔够，譬如好多职场上遇着问题唔识得应对，希望佢呢方面畀多啲做人处事嘅经验我。」虽然上次公开恋情最终没有好结果，但盈盈将来再拍拖仍会继续公开，「以我一个比较坦承直率嘅性格，有好消息一定会同大家分享，都守唔住㗎啦，坦白讲喺呢个世代玩地下情都唔会长久。」