【独家】同王浩信车厢激咀忍唔住笑 张振朗唔想再拍裸跑戏

去年夺得「飞跃进步男艺员」嘅张振朗(Owen)受TVB力捧，告别「地狱黑仔王」之名。主演嘅新剧《反黑路人甲》中仲有好大发挥，除咗有唔少打斗场面外，仲要牺牲色相裸跑兼要同王浩信有激咀戏。问到跟王浩信Kiss有咩感觉？最近同女友杨偲泳好Sweet嘅张振朗语带双关：「我好『正直』㗎。」采访：方骞平 鞋履：HOAX

在《反黑路人甲》中饰演卧底嘅张振朗因为同王浩信第二次合作所以好有默契，「我哋同一个channel，都系『无聊』底，所以戏外经常会倾偈度啲新嘢出嚟。」Owen表示今次同王浩信hehe情升华咗，拍亲热戏拍到忍唔住大笑。「我哋喺车厢入面有场狂风扫落叶式嘅咀对咀戏，我哋做咗好多唔同肢体动作，拍嗰阵我系完全忍唔到笑，因为当时我连佢呼吸同心跳声都听到，一听到就觉得好想笑。」

做乜女友都咁支持
在剧中，张振朗要拍一场裸跑戏，当事人强调好难忘，仲唔希望拍第二次。而对于跟同性拍咀戏，他坦言较跟异性容易Handle啲，尤其同相熟演员拍摄，话嚟就嚟先冇咁尴尬。「连女友都好奇追问『场戏好唔好睇？』，套剧宗旨想观众睇得开心，喺疫情下笑返一晚经已好满足，而我嘅演技，当然有进步空间啦！」张振朗最近迷上玩电单车，更花10几万添置咗部怀旧电单车享受男人的浪漫！他说：「揸住电单车去山旮旯地方周围探索，系enjoy时刻，不过，喺好安全情况下，我先会载埋女友出发，始终电单车比较唔安全，但佢好锺意我揸电单车，因为觉得好型。」