【甜蜜反手抱】何超莲熊抱揽到实 窦骁摸Pat偷吻闪到盲

去年4月，赌王三房千金何超莲承认跟内地男星窦骁拍拖，热恋期特别甜，超莲经常喺社交平台晒恩爱，「窦莲恋」被睇好。

上月，窦骁以何家「准女婿」身分陪超莲出席赌王丧礼，留港至今都一直住喺三太的豪宅同超莲同居，可以日见夜见女友，又有健身室可用，生活咁写意难怪仲未愿返内地开工。

寻晚，超莲上载短片到抖音，片段男女主角分别系窦骁同超莲，男方话要教女方玩游戏，叫佢弯身再将手伸向后面，因为动作太奇怪，超莲做咗一阵就唔肯做，仲撒娇推男友质疑被呃，但之后都配合男友跟住做，原来男方同女方玩甜蜜反手抱，电光火石间，男方一捉住女方双手向上一拉，女方就反转咗个人然后直扑男友怀中，熊抱加双脚夹实窦骁嘅超莲笑到癫，而男方为怕女友跌，即用手包实女方Pat Pat，临尾更突然用咀啄咗女友块面一吓，成串动作劲有中学生拍拖初恋Feel，好甜好闪，盲嘞喂。