【独家】首做男一剧网民吁罢睇 森美独家剖白：尊重每一个人谂法

去年嘅社会运动，森美多次有感而发，亦曾试过喊住做电台节目！由他处男担正嘅无綫新剧《过街英雄》将于下周一晚八时半首播，因为政见不同，有网民要求TVB停播，甚至发起罢睇行动。对于首部男一剧卷入颜色风波，森美表现平静：「我唔系一个政客，我尊重每个人嘅谂法。」采访：方骞平 场地：The Code 服装：Blaack

在TVB 14年，森美终于等到做男主角，新剧《过街英雄》其实已拍毕两年，本安排于上年尾播出，由于当时社会气氛紧张、警民关系欠佳，不利踩界题材，所以改播洪永城及汤洛雯主演嘅《丫鬟大联盟》，而《过街英雄》先安排于海外推出。

全靠罗兰姐点醒自己
今年终安排剧集于暑假黄金靓期播出，估唔到又有罢睇暗涌，对于有政见不同嘅网民的激动行为，森美有话要说：「其实由写故事到拍摄至出街，系经过编剧、编审、监制等多重审视，套剧系唔涉及任何政治，只系讲正义感，作为艺人做好自己工作就得啦。」他又以前辈罗兰姐作例子：「做艺人有时好担心角色同自己有冇冲突？曾经请教过罗兰姐，佢就话『自己系虔诚天主教徒，但又拍好多鬼片，呢啲只系关于工作职业，唔代表系本人。』呢个都系前辈教我嘅谂法，我觉得真系好好。不过，每个人都有自己嘅睇法，唔可以将自己一套睇法去迫人认同，我又唔系一个政客，如果我系一个政客，我梗系想你跟我啦！如果唔系嘅话，都冇必要因为大家谂法唔同而唔开心，我尊重每个人谂法。」

学习唔伤感情的争拗
过去一年嘅社会运动令森美有所启发，「大家学懂一样嘢，就算阿爸同子女、兄弟姊妹都可以有唔同睇法，如果因为咁而憎咗大家，一听就知道件事系有唔啱啦！爸爸同个仔谂法唔同，唔通就冇父子做咩？我觉得呢个谂法真系唔应该。」森美还说就算唔讲政治，屋企大小事都可以有争拗。「好似买部电视机，拣大细都有得拗，问题系点样喺争拗过程中唔伤及感情，呢啲就系要学习嘅地方。」问他有否信心和平解决得到唔同立场争拗？森美答得坚定：「香港人冇嘢系解决唔到嘅，我对香港人有信心。」

避开撞子孙根而拗柴
森美在新剧中，有场戏要他从小型货车顶跳落嚟，再用脚叉住动作演员个头落地，其间发生拗柴裂骨意外，森美讲返呢件意外都觉得几好笑：「本身系好安全，但第一次拍时我个裤头揩咗落动作演员个鼻度，我个重要部位好痛，对方就好阴功，佢个鼻对住我嘅子孙根。所以第二Take就一就，落脚时唔啱位，踩咗落塌塌米中间，只脚摄咗入去拗柴，哈！我终于讲到动作演员好威嘅一句：『冇事，唔紧要，拍埋佢！』」