【独家】拍警匪电影被网民「问候」 乔宝宝冒险返港只求搵啖食

返苏格兰同家人团聚，享受5个半月退休生活的乔宝宝，两周前低调返港隔离，原来佢接拍咗新戏《时代》。近日香港疫情持续严峻，连续多日录得百几宗确诊个案，乔宝宝唔太担心，因为要搵食冇办法，但他承认今次返港都几无奈，因为所拍电影带有「颜色」，「无啦啦俾人私讯『问候』，坐港铁出入，乘客见我系南亚裔人即刻弹开，怕我会带病毒！」好彩TVB见他回港主动搵佢拍剧，宝宝话总算有额外花红。采访：方骞平

本周日，乔宝宝喺西贡蚝涌村村公所拍煞科外景戏，剧情讲饰演警务处助理处长嘅宝宝指挥下属部署任务，原先导演想加一场戏，安排39岁的黄榕为他急救包扎伤口，但因超时而取消。宝宝笑说：「我有老花，冇戴眼镜睇唔清楚黄榕，听讲佢上围数字几吸引！」戏内黄榕要着住医护急救制服被迫「封胸」，问黄榕怕唔怕疫情？她强调自己常做运动，免疫力较好。

我爱香港冇政见立场

今次冒险回港拍戏，宝宝强调完全为咗搵食：「喺疫情下仲有工开好难得，虽然收返8年前片酬，但老板好有心，包埋机票同住宿，既然喺苏格兰无所事事，印度餐馆只系做外卖唔使咁多人手，咪返嚟搵食罗。」据《香港中国通讯社》透露，电影讲述新闻报道员与香港警察携手合作，揭发一连串社会暴力行为与外部势力干预有莫大关系。对于所接拍嘅电影被不少网民「高度关注」，宝宝坦言接拍前只知道是一部警匪片，「话有个警官角色需要一位外籍人士，至于内容及合作演员就唔太清楚，接咗之后就俾网民留言狂闹，甚至爆粗『问候』，真系好无奈，我又唔系刘德华、周润发，冇得拣角色，只系做返演员本份。」宝宝愈讲愈灰，「我冇政见立场，每个香港人都系我朋友，我好爱香港，当日香港疫情第一波，我专程由印度运口罩返香港派畀弱势社群。有时做人都几艰难，正如当日拍《机动部队2019》，都有旧同事不满我拍戏唱衰纪律部队。」

做好防疫拍戏唔使怕

喺疫情下拍戏，宝宝话会更加小心同注意个人卫生，「之前喺沙田隆亨邨入面嘅餐厅取景，因为条邨有多宗确诊个案，剧组都拿拿声转场去大围拍，呢方面导演安排得好好，大堆头场面都尽量搵外景，咁样有空间去保持距离。」宝宝又说九成香港人都有戴口罩，情况比外国好，只要豁免强制检疫方面把关得好啲，控制情况应有改善。「不过，因为我系南亚裔人，戴住口罩坐港铁都会被歧视，最初我唔知，以为坐错咗去关爱座，点解左右两边都冇人嘅！」

另外，因为唔够Job做，去年已离开TVB嘅乔宝宝获邀再回巢，为一套合拍剧其中一个单元演出，突然变得有「市场」，宝宝笑说：「所有工作我都无任欢迎，但我答应陪细仔过生日，所以一定要9月前离港。」