【众筹得2万】唔够钱拍真MV焗低成本制作　肥仔＠ERROR牺牲色相激凸上阵

男子组合MIRROR近日推出新歌《IGNITED》，发布「Too Hot To Handle Version」MV后，不少粉丝不满经理人兼MV导演花姐偏心，无论成员的镜头及歌词份量都分配不均。然而，同样出身自ViuTV选秀节目《全民造星》的另一组合ERROR似乎亦遭公司大细超，成员193（郭嘉骏）前日于社交网撰长文，直言因ERROR给予人「骑呢、岩巉、样衰、搞笑、无脑」的形象，导致工作受局限，希望成为Fashion Model/Icon的他苦呻：「我亦都好羡慕Mirror会有唔同嘅时装品牌搵佢哋好型好chok咁拍广告，收钱着住时装品牌嘅衫出event……」

其实4月初ERROR都出了一首歌《我们很帅》，当时于YouTube发布了「官方正式假MV/歌词版」MV，影片中四子恶搞扮成经典台剧《流星花园》中的F4，而整个MV均以照片Slideshow形式，再穿插部分影楼Behind the scene的短片制作而成，极之粗糙。该MV推出后，ERROR都在社交网呼吁粉丝买Tee众筹，让他们有机会拍个「真MV」，结果事隔两个多月，日前《我们很帅》真MV终于曝光，喺短短两日累积近4.7万Views之馀，仲成功登上YouTube热门！

在「真MV」一开头，成员保锜（吴保锜）宣布合共卖出的404蚊一件Tee，最终扣除成本共筹得2万多元，再减去租场及置景两项费用，已超支3,500蚊Budget，成员们不单止要「倒贴」，仲要请大班幕后做「义工」帮手拍摄，193说：「所以今日拍MV嘅形式，将会喺工作人员冇粮出嘅怒气同美感之间拎番个平衡，希望大家细心欣赏。」故以「All white look」示人的四子就在简陋的白色布景前下跪，任由工作人员用装满颜料的水枪、气球水弹等狂砸，搞到他们由头到脚全身五颜六色，当中最大牺牲的莫过于肥仔（梁业），事关笠上「冬菇头」假发劲Cute的他，仅穿Tube Top加白色三角底裤，媲美电影《西游记第壹佰零壹回之月光宝盒》中吴孟达的「性感夏威夷女郎」造型；片中，其下体仲被Close up（特写）影住俾气球水弹重击，真系隔住个Mon都觉得又痛又尴尬，其后还被花盆高空掷落头，当场翻白眼「晕倒」，非常爆笑！

如此用（苦）心制作，自然获得大批网民赞好！对于该MV冲上YouTube 热门，阿Dee（何启华）昨晚于IG留言：「我其实好开心，大家为我哋心痛。咁证明咗《#Error自救TV》嘅成功，令大家睇到另一面嘅我地，亦证明咗我哋唔需要单一地只做哗众取宠嘅事而获得大家嘅认同，因为Error正在锐（蜕）变；你哋点睇个MV亦都反映咗，你哋自身对我哋嘅投射同认知。今次Mike导x《#花姐Error游》班底，用咗一个好聪明嘅手法，低成本去拍咗个不乏深度嘅MV，行刑、水弹、颜料、大染缸⋯残酷吗？其实并不残酷，现实Error就系咁样杀出一条血路。我很喜欢这个MV，唯一遗憾系唔够budget请班比坚尼女郎同我哋拍，配合返《我们很帅》呢个主题。但我相信，苦尽必定甘来，这个时代就是一个，要一起咬紧牙关地过的时代『有你有我』，唔系一个口号，系一个事实，因为有你哋，我哋会继续挣扎，直到看见那一条雨后的彩虹。」