【独家】陈展鹏赞唇厚够性感唐诗咏惊觉自己有另类戏路

2020-06-23 20:25

曾经系「御用拍挡」嘅陈展鹏、唐诗咏继去年《唐人街》后再合作，今次喺文伟鸿新剧《超能使者》中玩到豁晒出去。日前拍一场戏，讲诗咏要闻展鹏个Pat Pat，男方再笃她块面然后变吹气Mary公仔。事后展鹏指诗咏唇厚既性感又可爱，诗咏笑言原来自己有另类性感！采访：方骞平摄影：谭壹致

喺疫情下需要欢乐，所以《超能使者》系一部疯狂式喜剧，首次演呢类剧种嘅陈展鹏及唐诗咏异口同声话已经豁咗出去，点样做都唔会尴尬，只系会尽力去配合，好彩两人好有默契，唔怕玩多啲。日前两人一早拍一场搞笑戏，讲饰演临时演员嘅展鹏误会畀临记阿头唐诗咏整蛊，搞到吊咗好耐「威吔」，整痛「小鹦鹉」，他痛到戚住裤裆，O形脚行路。因此，他「大报复」，搞到诗咏要弯身曲脚去闻佢箩柚，又要扮吹气Mary嘅鲤鱼嘴，更要「罚坐」无影凳，诗咏坦言：「好彩有做开运动，但都好攰。」

吊「威吔」有心得
展鹏笑指诗咏双唇够厚，好有扮吹气Mary嘅潜质：「不过呢个Mary既性感又可爱，系人工智能升级版，入得厨房出得厅堂。」诗咏笑说：「𠵱家发掘到自己多一个优点！原来系有另类性感，佢畀到信心我行另一条路线！」展鹏说：「我哋前期成日合作，但有段时间戏路唔啱，我愈搞愈成熟变咗大叔咁，佢就系宅男好锺意嘅女神。」两人又话吊「威吔」好易勒痛下身，展鹏自爆经验之谈，吊「威吔」时他的「小鹦鹉」要放正喺中间位才安心。