【独家】 佗B八个月 发烧喉咙痛兼肚泻 雨侨疑患肺炎入院留医

雨侨和罗力威情人节宣布陀B成功，B女预产为8月，原本她怀孕8个月以来，过程一直好顺利，只是头3个月试过有妊娠不适，想不到她两个星期前曾一度入院留医。原来她突然出现喉咙痛和肚泻情况，更发烧到38.3度，入到医院一度被怀疑患上新冠肺炎，要即时隔离做快速测试，虽然半夜得知非肺炎，但仍未搵到病因，搞到她和老公担心了成晚，幸好之后得知只是肠胃炎，绝对是她陀B以来最惊险一次，打算顺产生B的她，希望不会再有更惊险情况发生，B女能够顺利来到世界。采访：杜淑霞

雨侨陀B后一直深居简出，老公罗力威亦力赞她叻叻猪，「好多谢老婆咁叻叻猪陀得咁好，佢好乖，佢自己识得令自己舒服啲，佢对佢自己好负责，唔使我操心，佢自己搞得掂，系啲体力嘢嘅家头细务由我嚟。」



罗力威又踢爆，雨侨试过半夜突然想食班戟，「我唔理佢㗎！最多瞓醒第二日再整畀佢食罗！」孕妇口味成日转变，但又成日呕搞到冇晒胃口，疫情期间陀B的雨侨特别辛苦，更试过为了碗米线搞到喊，「嗰日我好想食米线，但嗰类店铺通常啲位置比较窄，上网搵到间濶啲但有啲远嘅咪搭车去，点知坐得耐车搞到想呕，唯有坐喺啲后巷路边呕，去到食米线嗰度我已经冇晒胃口，咪望住碗米线喺度喊罗！」

惊BB突然出世
呢啲当然是小事，平日通常自己下厨的雨侨，因为家里装修BB房，太攰之下决定出街食，点知食完返到屋企就出事，「嗰日我突然觉得喉咙痛，又肚泻兼且发烧烧到38.3度，老公即刻帮我搵私家医院，但系佢哋都唔肯收，我哋唯有去公立医院。（有冇担心系新冠肺炎？）其实我哋唔觉得会系，因为我哋又冇去过啲咩地方，但系个个患者都系觉得唔系自己，同埋我始终大住肚，当然特别担心。去到医院，佢哋都即时隔离咗我，我同老公讲声bye bye都唔得，嗰晚真系好担心，成晚瞓唔到，虽然个快速测试半夜有结果，但系我一路未退烧，好多检查都未有结果，根本唔知系咩事，好彩第二日退咗烧可以畀我返屋企先。」

不过雨侨跟罗力威都担心了成个星期，幸好检查结果出来，终于证实只是肠胃炎，「呢次真系陀BB以嚟最惊险一次，之后自己真系小心咗好多，唔敢再出街食嘢，希望唔会再有下次更惊险嘅事啦！」由于雨侨决定顺产，又不请陪月及家佣帮手，到时只会靠两家长辈及亲人协助，所以她也担心BB突然出世会再有惊险事发生，「呢排我除咗同老公去诊所做检查，或者一齐上堂学凑BB之外，都好少周围去，因为BB有可能早出嚟，如果佢喺啲唔适当场合出嚟就弊，走佬袋又冇，唔希望比上次入医院更惊险啦！希望BB出世时可以顺顺利利啦！」