晒赤膊照向胡子彤学习　吴肇轩盼早日成「露体魔人」

影坛小鲜肉吴肇轩、胡子彤、朱鉴然和林家熙好老友，早前仲孖住一齐去沙滩Camping，天气咁热，运动员出身的胡子彤和朱鉴然梗系要除衫晒肌啦，不过睇匀成辑相，唔知系怕俾蚊叮？抑或怕身材被比下去呢？吴肇轩和林家熙就全程都好密实。事隔1个月，昨日吴肇轩忽然于IG贴出一张赤裸上身瞓喺帐幕的相，虽然两点同腹肌都巧妙地遮晒，基本上都冇乜嘢睇，但他扬言：「向胡子彤学习，早日成为露体魔人。」相信是打算努力操肌。

对此，胡子彤留言：「喂，我边有啫。」否认是「露体魔人」，不过唔知系咪有人会错意呢？吴肇轩即Tag其馀两兄弟并谓：「佢话佢冇。」究竟系冇咩呢？林家熙就帮胡子彤解围：「佢都唔系呢个意思。」咁系咩意思呢？大概只有他们4人先Get到。另边厢，蒋雅文妹妹蒋雅诗都有留言，她打趣道：「唔好喺我面前露两粒（点），我会剪走佢。」睇到对方咁「暴力」，吴肇轩都即刻笠水说：「um...唔好跟我去沙滩玩。」笑死！