【头条独家】39歳冇女 自爆单身之谜 黄宗泽最憎女人黐身又小器

黄宗泽（Bosco）最近在新剧《飞虎之雷霆极战》饰演前特工「汪国栋」， 同特工张曦雯「邱皓月」有段刻骨铭深心爱情。现实中，年底12月便踏入4字头的Bosco，虽然绯闻传唔停，早前更有指他挞着内地女星张沙沙，同时又疑似跟陈嘉桓同居，不过Bosco都一一否认，强调两女只是好友关系。单亲家庭长大的Bosco，仲话完全冇结婚憧憬，除非无端端缘份到至会谂结婚，又讲明自己重友轻色，女朋友绝对唔可以黐身或者要求佢报到，要畀佢有超大自由度，而最重要一点就系女方要唔计较，就算他有绯闻传出都唔可以小器，问到会否跟圈中人易啲拍拖，他笑言：「呢啲睇佢哋造化！」撰文：杜淑霞 摄影：李维隆 形象：Queenie Yu 发型：Kel Fung @ HH hair.nail 化妆：Cyrus Lee 服装：Golden Goose、Giuseppe Zanotti

今年12月13日Bosco便40岁，自从12年跟胡杏儿分手后，先后承认跟模特儿杨峥及日本模特儿Jun短暂拍拖，可惜最终都分手收场。之后Bosco绯闻继续传唔停，似乎仲未愿定落嚟，而近排他跟两名女星名字扯上关系，分别是内地女星张沙沙及陈嘉桓。有指15年Bosco跟来自黑龙江省齐齐哈尔的张沙沙因合作内地剧《最好的我们》挞着，之后Bosco瞒住「正印」跟陈嘉桓合作剧集《守护神之保险调查》发展恋情，更疑似同居。去年圣诞节，有指张沙沙来港探Bosco，陈嘉桓更要被迫搬离爱巢避「正印」，令她大受打击。

对于跟两女关系，Bosco答得轻松，「friend嚟罗！我哋都讲咗，识咗好耐，工作之下合作识，大家间唔中都有message。（之前张沙沙嚟香港探你？）嗰日佢嚟搵郑嘉颖影相都唔搵我影，谷鬼气，佢仲要话系路过嚟香港喺中环，我话我又喺中环拍戏喎！（即系佢嚟探班同郑嘉颖影唔同你影？）可能佢嫌弃同我，影完又同我传绯闻。」至于陈嘉桓，不论自己及细佬生日都爱去Bosco的餐厅开生日会，他就解释，「我哋折头又大喎！签吓啲小食，签吓啲酒畀佢哋饮，唔嚟我度去边个度呢？有埋单㗎！你估唔使埋单呀！」






似同妈咪相处

既然两个绯闻女友非真命天女，Bosco拣女朋友又有咩条件先？「首先唔好介意我成日唔喺屋企，因为成日拍嘢会出咗去，周围走㗎嘛！又唔介意我锡朋友多过锡女朋友啦！我会㗎！唔好介意我喺屋企好静，睇足一日电视、睇走一日戏唔出声都得。仲要唔计较罗！（有绯闻都唔可以小器）梗系啦！」问到会否圈中人较适合，他就笑言：「呢啲睇佢哋造化，如果你话我自私，我会拣圈外，唔好咁复杂啦！直情唔接触，最多话畀你听工作性质系咁，唔接触最好。（你报唔报到㗎？）去到边度都要讲，梗系唔得啦！要好大自由度，好似我阿妈咁，我从来唔同佢报到㗎！呢排可能密啲，因为疫情关系，但如果平时我开工，几日都唔通一次电话，佢亦都唔会主动搵我。（即系好似同妈咪相处咁，放养？）都OK，放养，够钟食饭识返嚟。」



单亲家庭长大的Bosco，强调就算已届适婚年龄，也未必会结婚生B，「你当我自私，我从来都冇谂过，有啲人一定要结婚，我从来冇一个咁嘅界限畀自己。（生B？）我唔恨，我成日叫我啲朋友快啲生啦！畀我玩，有得玩就OK。」Bosco仲话连妈咪亦冇催婚，「我阿妈又完全冇理过我。（放弃咗？）我有个入行就识嘅前辈，嗰日食饭倾开偈，讲开我话搵个女朋友，我阿妈未必锺意嘅啫，个前辈就话『唉！你阿妈真系要锺意，你随时做和尚都得啦！』哈哈！真系清楚我阿妈，我阿妈要求都高㗎！但系佢真系冇催，佢冇乜所谓，我哋都open嘅，可能我单亲家庭，冇乜呢个概念，我冇嗰个画面，即系老窦阿妈跟住个小朋友咁，由细到大都冇乜呢个谂法，可能有日缘份到无端端结婚都未定。」