【争食小鲜肉】吴肇轩自认太好味　朱鉴然晒蚊叮红肿「猪蹄」

近月受疫情影响，大部分电影拍摄工作都煞停，4位影坛小鲜肉朱鉴然、胡子彤、吴肇轩和林家熙趁未使开工，早前约埋一齐去行山执垃圾，非常有意义。昨日，众人则于Instagram（Ig）出Po透露去了沙滩露营，朱鉴然和林家熙更自爆是人生第一次，而相中，看到他们又玩水又搭帐篷，4子夜晚仲围住个火倾心事，真系好「Bromantic」！不过，事后朱鉴然苦呻好多蚊，还晒出畀蚊针到变「猪蹄」的小腿，他写道：「第一次的露营。很感恩能跟你们一起经历，一起畀蚊咬，一起畀海浪声搞到完全无得瞓，一起早上游泳。请注意：香港是不适宜夏天露营的，现在我知道了。#camping #outdoors #咖啡要加奶 #结界 #吴肇毡 #营火」吴肇轩亦搞笑留言：「右脚16粒，左脚唔想数，我哋太好味。」未知他是在数自己的「战绩」，抑或咁得闲帮朱鉴然数呢？

同样献出了「第一次」的林家熙也有感而发，他说：「有几样嘢特别想讲！就系好多蚊！我喺营入面望住个蚊帐已经有超过20只想强攻入嚟！同埋原来听住海浪声瞓，都真系几大声！同埋起身见到要执嘢嗰一刻，个人会有半个钟至一个钟function唔到！多谢。」有网友就留言：「好快会去第二次。」不过林家熙好决绝地回覆：「唔会。」并谓就算有下次，睇怕都要等天气转冷先再露营。